गोरखापत्र समाचारदाता
काठमाडौँ, माघ १५ गते । आगामी चैत ७ गतेदेखि ११ सम्म काठमाडौँमा आयोजना हुने आठौँ नेपाल अन्तर्राष्ट्रिय चलचित्र महोत्सवमा राष्ट्रिय प्रतिस्पर्धा अन्तर्गत चलचित्र ‘सानो संसार’ छानिएको आयोजक संस्था नेपाल चलचित्र तथा सांस्कृतिक प्रतिष्ठानले जनाएको छ । माघ २ गते ७० देशका ६ सयभन्दा बढी चलचित्रबाट ४० देशका ८७ चलचित्र महोत्सवका लागि छानिएको आयोजकले सार्वजनिक गरेको थियो ।
नेपाली फिचर फिल्म प्रतिस्पर्धामा छानिएको चलचित्र ‘भुठान’ का निर्माताले सबैलाई जानकारी नभएको भन्दै असन्तुष्टि व्यक्त गरेपछि सो चलचित्रलाई महोत्सवबाट हटाइएको हो । उक्त चलचित्रलाई हटाएपछि त्यसको सट्टामा अर्को चलचित्रलाई समावेश गर्न सकिने हुनाले इच्छुक चलचित्रकर्मीलाई आवेदनका लागि आयोजकले सामाजिक सञ्जालमार्फत आह्वान गरेको थियो । त्यसपछि प्राप्त चलचित्रमध्येबाट ‘सानो संसार’ छानिएको आयोजकले विज्ञप्तिमार्फत जनाएको छ ।
