सावित्री गिरी
कोहलपुर, जेठ १० गते । बाँकेको खजुरा गाउँपालिका नवनिर्वाचित अध्यक्ष नेकपा माओवादी केन्द्रका डम्बर विकले जनसहभागितामूलक विकासलाई मुख्य रूपमा जोड दिने बताउनुभएको छ ।
जनचाहना र जनसहभागितामा हरेक विकास निर्माणदेखि सामाजिक विकासका सवालमा गम्भीर भएर काम गर्दा परिणाम राम्रो आउने भन्दै उहाँले यस्तो कुरामा जोड दिनुभएको हो ।
उहाँले प्रमुख रूपमा शिक्षा, स्वास्थ्य, स्वरोजगार, खेलकुद, नेतृत्व विकास तथा समान अवसरका सवालमा सबैलाई समेटेर काम गर्ने चाहना व्यक्त गर्नुभएको छ ।
पदभार ग्रहण गरी शुभकार्यको थालनी गरिसक्नुभएका अध्यक्ष विकले पाँच वर्षको कार्यकाललाई अवसर र चुनौती दुवै रूपमा लिनुभएको छ । यसभन्दा अगाडिका जनप्रतिनिधिले गरेका राम्रा निर्णयलाई कार्यान्वयन गर्ने र गुनासोलाई उचित सम्बोधन गर्ने उहाँले बताउनुभयो ।
खजुरा गाउँपालिकाका उत्पादनका दृष्टिकोणले उर्वर भूमि भएकाले कृषि विकासमा विशेष योजना बनाएर काम गर्छु उहाँले भन्नुभयो, “यहाँका अधिकांश स्थानीयको मुख्य पेसा कृषि हो । कृषिलाई व्यावसायीकरण गर्न सकेमा आत्मनिर्भर बन्न सक्ने प्रसस्त ठाउँ छ । मतदातासँग घरदैलो गर्ने क्रममा गुणस्तरीय विकासको माग गरेकाले यसतर्फ आफू चिन्तित भएको बताउनुभयो । यसका लागि हिजोका कमिकमजोरीलाई सच्याएर अगाडि बढ्ने प्रतिबद्धता पनि उहाँले राख्नुभयो ।
सामुदायिक विद्यालयमा गुणस्तरीय शिक्षा प्रदान गर्नका लागि लगानीको वातावरण र जनशक्तिको विकासमा पनि उत्तिकै ध्यान दिने उहाँको उद्घोष रहेको छ ।
उहाँले अबको पाँच वर्ष जनताको सेवक भएर बिताउने प्रण गर्नुभएको छ । ठूल्ठूला विकासका खाका कोर्नेभन्दा पनि साना र महìवपूर्ण अपेक्षा पूरा हुने खालका काम गर्न जरुरी रहेको उहाँले बताउनुभयो ।
निर्वाचित अध्यक्ष विकको राजनीतिक यात्रा निकै सङ्घर्षपूर्ण रहेको छ । विद्यार्थी जीवनदेखि राजनीतिमा होमिनुभएका विकले माओवादी जनयुद्धदेखि हालसम्मको राजनीतिक अनुभव लिइसक्नुभएको छ ।
पार्टीको बाँके जिल्ला अध्यक्ष हुँदा विकले राम्रो छवि बनाउनुभएको छ । यसभन्दा पहिले पनि खजुरा गाउँपालिकामा अध्यक्ष पदका लागि प्रतिस्पर्धा गर्नुभएका विक दोस्रो पटक सफल हुनुभएको हो ।
नेकपा एमालेले अध्यक्ष पद सम्हालेको पालिकामा गठबन्धन आउँछ कि आउँदैन भन्ने आशङ्काका बीचमा विकले राम्रो जनमत ल्याउनुभएको हो । यो जनमतलाई सधैँ सम्मान गरेर काम गर्ने विकले बताउनुभयो ।
Gorkhapatra...
