मायादेवी मन्दिरमा लुम्बिनी लायन्सको जर्सी सार्वजनिक

काठमाडौँ, मङ्सिर १ गते । नेपाल प्रिमियर लिग (एनपीएल) टोली लुम्बिनी लायन्सले लुम्बिनीको मायादेवी मन्दिरमा खेलाडीले लगाउने जर्सी सार्वजनिक गरेको छ । 

आनी छोइङ डोल्मा, टोलीको  ब्रान्ड एम्बेसडर नायक राजेश हमाल र मार्की खेलाडी एवं राष्ट्रिय टोलीका कप्तान रोहितकुमार पौडेलले शनिबार जर्सी सार्वजनिक गर्नुभयो । 

जर्सी लुम्बिनी प्रदेशको प्रतिनिधित्व हुने र स्थानीय संस्कृति झल्कने गरी डिजाइन गरिएको बताइएको छ । गाढा नीलो रङ्गको जर्सीमा सुनौलो रङ्गको किनारा रहेको छ भने बायाँ भागमा आक्रामक अवतारको सिंहको टाउको प्रतीक रहेको छ ।

नेपाल क्रिकेट सङ्घ (क्यान) ले आयोजना गर्न लागेको एनपीएल मङ्सिर १५ देखि पुस ६ गतेसम्म त्रिवि मैदान कीर्तिपुरमा हुनेछ ।