शालिग्राम नेपाल
चितवन, असोज ११ गते । निरन्तर वर्षा भएपछि मुग्लिन–नारायणगढ सडक खण्ड शुक्रबार साँझदेखि शनिबार बिहानसम्म सवारी साधन सञ्चालनमा रोक लगाइएको छ ।
सम्भावित जोखिमलाई ध्यान दिएर बेलुका ७ बजेदेखि विहान ५ बजेसम्म यातायात सञ्चालनमा रोक लगाइएको प्रमुख जिल्ला अधिकारी इन्द्रदेव यादवले जानकारी दिनुभयो ।
भारी वर्षाले गर्दा पहिरोको जोखिम उच्च रहेको भन्दै जिल्ला सुरक्षा समितिले नारायणगढ–मुग्लिन सडकमा रातिको समयमा गाडी चलाउन नपाइने भएको प्रमुख जिल्ला अधिकारी यादवले जानकारी दिनुभयो ।
चितवनका प्रमुख जिल्ला अधिकारी इन्द्रदेव यादवले नारायणगढतर्फ आँपटारी र मुग्लिनतर्फ मुग्लिन बजारमा गाडी रोकिनेछ । यो सडक खण्डको कालिखोला, घुमाउने, सिमलताल लगायतको स्थानमा पहिरोको जोखिम छ । साना पहिरो गए पनि अहिले सडक अवरुद्ध हुनेगरी पहिरो नखसेको जिल्ला प्रहरी कार्यालय चितवनले जानकारी दिएको छ ।
साँझ ७ बजेदेखि बिहानसम्म पूर्णरुपमा निषेध गरिएको जिल्ला प्रहरी कार्यालय चितवनका प्रवक्ता श्रीराम भण्डारीले जानकारी दिनुभयो । आपतकालीनका सवारी साधन बाहेक कुनै पनि साधन चलाउन नपाइने उहाँले बताउनुभयो ।
डिभिजन सडक कार्यालय चितवनका सूचना अधिकारी चन्द्रेश्वर साहले पहिरो जाने जोखिम स्थानमा डोजर, लोडरलगायतका सामग्री तयारी अवस्थामा राखेको जानकारी दिनुभयो । सिमलताल, १७ किलो र मुग्लिनमा पहिरो पन्छाउने साधन राखिएको बताउनुभयो ।
