नयाँ मतदाता परिचयपत्र वितरण गरिँदै

काठमाडौं, वैशाख २८ गते । काठमाडौंस्थित सङ्कटा मन्दिर परिसरमा रहेको वडा कार्यालय अगाडि स्थानीय तह निर्वाचनका लागि नयाँ मतदाता परिचयपत्र वितरण गरिँदैछ ।

निर्वाचन आयोगले नयाँ मतदाताहरुका लागि बुधबार र बिहीबार मतदाता परिचयपत्र वितरण गर्दै आएको छ ।

पहिलो पटक मतदाता नामावलीमा नाम दर्ता गराएका नयाँ मतदाता तथा परिचयपत्र हराएर निवेदन दिएकाहरुलाई आयोगले नयाँ परिचयपत्र उपलब्ध गराउँदै आएको छ ।

आयोगले सम्बन्धित मतदान केन्द्रबाट मतदाता परिचयपत्र वितरण गर्ने जनाएको छ ।

स्थानीय तहको निर्वाचनको मतदान वैशाख ३० गते शुक्रबार देशभर हुँदैछ ।

निर्वाचन आयोगका प्रमुख आयुक्त दिनेशकुमार थपलियाले मङ्गलबारको पत्रकार सम्मेलनमा मतदाता नामावलीमा नाम भएका तर कुनै कारणले मतदाता परिचयपत्र प्राप्त गर्न नसकेका मतदाताले आफ्नो नागरिकताबाट पनि मतदान गर्न सक्ने व्यवस्था मिलाइएको जानकारी दिनुभएको छ ।