कमल खत्री
नेपालगन्ज, जेठ ७ गते । नेकपा (एमाले) बाँकेको अध्यक्षमा निरक गुरुङ निर्वाचित हुनुभएको छ । सोमबार घोषणा गरिएको मतगणना अनुसार गुरुङले दुई सय ९१ मत प्राप्त गर्नुभएको छ । उहाँका निकटतम प्रतिद्वन्दी डिल्ली विसीले १५४ मत पाउनुभयो । गुरुङले एक सय ३७ मतको अन्तरले विसीलाई पराजीत गर्नुभएको हो ।
यसैगरी, उपाध्यक्षमा रत्न खत्री विजयी हुनुभएको छ । खत्रीले तीन सय १३ मत पाउँदा उहाँका प्रतिस्पर्धी रबिन्द्र लम्सालले १३८ मत पाउनुभएको छ ।
सचिव पदमा बलराम भट्टराईले १३९ मत प्राप्त गर्दै विजयी हुनुभएको छ । उहाँका निकटतम प्रतिद्वन्दी खिलप्रसाद भुषालले एक सय १७ मत, भीम ओलीले ९५ र दत्त प्रसाद आर्चायले ८८ मत पाउनुभएको छ ।
महिला उपमहासचिव तर्फ निर्मला सुनारले १९८ मतसहित जित हासिल गर्नुभएको छ । उहाँको निकटम प्रतिस्पर्धी शारदा विश्वकर्माले १३४ र रचना श्रेष्ठले ११५ मत पाउनुभएको निर्वाचन मण्डलले जनाएको छ ।
उपमहासचिव खुलातर्फ भने किशोर थापाले २६३ मतसहित जित हासिल गर्नुभएको छ । उहाँका निकटम प्रतिद्वन्दी दिपक कुमार बर्माले १२९ मत र सोहनलाल यादवले ४५ मत प्राप्त गर्नुभएको छ । एमाले बाँकेको नवौं महाधिवेशन मार्फत सर्वसम्मत नेतृत्व चयन गर्ने प्रयास भएको थियो ।
अध्यक्षमा लगायतका पदमा एकभन्दा धेरै उम्मेदवारी परेपछि निर्वाचन भएको थियो । वर्तमान अध्यक्ष किस्मत कुमार कक्षपतिले आफ्नो उम्मेदवारी फिर्ता लिएपछि निरक र डिल्लीबिच नेतृत्वका लागि प्रतिस्पर्धा भएको थियो । कक्षपतिले निरकलाई सार्वजनिक रुपमा समर्थन गर्नुभएको थियो । मतगणना भइरहेको हलको माइक प्रयोग गरेर कक्षपतिले आफनो समर्थन निरक लगायतका व्यक्तिलाई रहेको भनेर अभिव्यक्ति दिएपछि केहि बेर विवाद भएको थियो ।
बाँके एमालेको नयाँ नेतृत्व छनौटका लागि ४ सय ६८ जना प्रतिनिधि मध्ये ४ सय ५८ जनाले मतदान गर्नु भएको थियो ।
जेठ ४ गतेदेखि एमाले बाँकेको जिल्ला अधिवेशन सुरु भएको थियो । एमाले बाँकेको नेतृत्व चयनका लागि दोस्रो पटक निर्वाचन भएको हो । यसअघि सातौं अधिवेशनमा पदम धिताल र अशोक कोइरालाबिच अध्यक्षका लागि प्रतिस्पर्धा भएको थियो । जसमा कोइरालाले जित हासिल गर्नु भएको थियो ।
