• गोरखापत्र अनलाइन
• १ पुस २०७९, शुक्रबार

उपाधि रक्षाको सँघारमा फ्रान्स

एमबापेको टिम फ्रान्सले बिहीबार बिहान मोरक्कोको विश्वकप फुटबल प्रतियोगितामा ऐतिहासिक यात्रा २–० ले समाप्त पार्दै फाइनलमा स्थान बनाएको छ। फ्रान्स फाइनल पुगेको खुसी मनाउन राष्ट्रपति इमानुअल म्याकरन पनि रङ्गशालामा उपस्थित हुनुहुन्थ्यो। यस नतिजापछि फ्रान्स र अर्जेन्टिनाबीचको उपाधि भिडन्त हुने भएको छ। पहिलो सेमिफाइनलमा लियोनल मेसीको प्रेरणामा रहेको टिम अर्जेन्टिनाले क्रोएसियाको चुनौती ३–० ले समाप्त पारेको थियो। विश्व फुटबलका दुई सुपरस्टारबीचको भिडन्त हुने भएकाले पनि विश्वकप फुटबलको फाइनलमा रोमाञ्चक थपिएको छ। फाइनललाई कलियन एमबापे भर्सेज लियोनल मेसीका रूपमा पनि लिइएको छ।