फडिन्द्र अधिकारी/रमेश पौडेल
लेखनाथ, माघ २० गते । आहा रारा पोखरा गोल्डकप फुटबलमा त्रिभुवन आर्मी क्लबले थ्रीस्टार क्लबलाई ३–० गोलले पराजित गर्दै इतिहास रचेको छ । प्रतियोगिताको २३औँ संस्करणमा शनिबार भएको फाइनलमा आर्मीले पहिलो पटक आहा रारा उपाधि जितेको हो । आर्मीले १२ लाख एक हजार रुपियाँसहित ट्रफी हात पारेको छ ।
सहारा क्लबको आयोजनामा हुने आहा रारामा आर्मीले पाँच वर्षअघि थ्रीस्टारसँग फाइनलमा व्यहोरेको हारको बदलासमेत लिएको छ । आर्मी यसअघि आहा रारामा चार पटक फाइनल पुगेपनि उपाधि जित्न सकेको थिएन । उपविजेता बनेको थ्रिस्टारले छ लाख एक हजार रुपियाँसहित ट्रफीमा चित्त बुझाएको छ ।
खेलको ३८औँ मिनेटमा आर्मीले अग्रता लिएको थियो । जिलेस्पीजंग कार्कीले हेडरमार्फत गोल गर्दै आर्मीका लागि खाता खोल्नुभएको हो । सिद्धान्त चौधरीले दिएको पासलाई कार्कीले गोलमा परिणत गर्नुभएको थियो । दोस्रो हाफमा फत्तमान घलेले आर्मीका लागि अर्काे गोल थप्नुभयो । ८३औँ मिनेटमा फत्तेमान घलेले गोल गर्दै अग्रता दोब्बर पार्नुभएको थियो ।
दोस्रो हाफमा थपिएको छ मिनेटको अतिरिक्त समयमा आर्मीले अर्को गोल ग¥यो । आर्मीका लागि तेस्रो गोल वसन्त जिम्बाले गर्नुभएको हो । आहा रारामा त्रिभुवन आर्मी र थ्रीस्टार पछिल्लोपटक २०७५ को फाइनलमा आमनेसामने भएका थिए । त्यति बेला ट्राइब्रेकरमा थ्रीस्टारले आर्मीलाई ५–४ ले पराजित गरेको थियो ।
त्रिभुवन आर्मीले कप्तान भरत खबास र दुई फरवार्ड भरत खवास र दिनेश हेन्जन बिनै उपाधि हात पारेको हो । तीनै जना खेलाडी चोटका कारण शनिबार बेन्चमा थिए । आर्मीको कप्तानको जिम्मेवारी जिलेस्पी जंग कार्कीले सम्हाल्नुभएको थियो ।
खेलामा थ्रिस्टारले गोल गर्ने केही मौका पाए पनि उपयोग गर्न सकेन । थ्रिस्टारका प्रशिक्षक विक्रम लामा आफ्नो टिमले पाएका केही मौका उपयोग गर्न नसक्दा पराजित भएको बताउनुहुन्छ । यता, आर्मीका प्रशिक्षक मेघराज केसीले थ्रि स्टारले प्रभावशाली खेलेको भए पनि आफूहरुको स्टामिना र टिम वर्कका कारण विजयी भएको प्रतिक्रिया दिनुभयो ।
खेलमा त्रिभुवन आर्मीका विमल पाण्डेले बेस्ट प्लेयर अफ दि टुर्नामेन्टको अवार्ड जित्नुभयो । उहाँले टेल्जीको स्कुटर पाउनुभएको छ । मेघराज केसी प्रतियोगिताको उत्कृष्ट प्रशिक्षक घोषित हुनुभयो । उहाँले त्रिभुवन आर्मी क्लबलाई पहिलो पटक आहा रारा उपाधि दिलाउनुभएको छ ।
आर्मीका जिलेस्पीजंग कार्की उत्कृष्ट फरवार्ड बन्नुभयो । उहाँले शनिबारको फाइनलमा कप्तानीसमेत सम्हाल्नुभएको थियो । उहाँ फाइनल खेलको म्यान अफ दि म्याचसमेत हुनुभएको छ । आर्मीका समित श्रेष्ठ उत्कृष्ट गोलकिपर बन्नुभयो । आर्मीका लागि प्रतियोगिताभर तीन गोल गर्नुभएका दिनेश हेन्जन सर्वाधिक गोलकर्ता बन्नुभयो ।
उपविजेता थ्री स्टार क्लबका विवेक पौडेलले उत्कृष्ट मिडफिल्डरको अवार्ड पाउनुभएको छ । जावलाखेल युथ क्लबले फेयर प्ले अवार्ड जितेको छ । विभिन्न पाँच विधामा उत्कृष्ट खेलाडीलाई जनही २५ हजार र प्रमाणपत्र प्रदान गरिएको छ । माघ ९ गतेबाट सुरु भएको यसपालिको आहा रारामा एक विदेशीसहित १२ टोली सहभागी थिए ।
