दुर्घटनामा एकको मृत्यु, दुई घाइते

विष्णुप्रसाद पोखरेल
दमक, असोज १८ गते । झापामा सवारी दुर्घटना हुँदा एकजनाको ज्यान गएको छ भने दुई जना गम्भीर घाइते भएका छन् । शिवसताक्षी नगरपालिका–१० स्थित माइधारमा भएको सवारी दुर्घटनामा परी झापा गाउँपालिका–३ सिमलवारी बस्ने २० वर्षीय भवेश श्रेष्ठको मृत्यु भएको प्रहरीले जनाएको छ ।

बिहीबार बिहान ३ः३० बजेतिर पूर्वपश्चिम राजमार्गअन्तर्गत माइधारमा पश्चिमबाट पूर्वतर्फ आउँदै गरेको प्रदेश १–०१–०१६ प ४२८८ नम्बरको स्कुटर र पश्चिमतर्फ जाँदै गरेको एनएमसी डेरीको मे १ च ५८६८ नं को बोलेरो पिकअप एकआपसमा ठोक्किँदा दुर्घटना भएको प्रहरीले जानकारी दिएको छ ।

दुर्घटनामा स्कुटरमा सवार तीन जना गम्भीर घाइते भएका हुन् । घाइतेलाई उपचारका लागि बिर्तामोडस्थित बीएण्डसी अस्पतालमा पुर्‍याउन साथ श्रेष्ठको मृत्यु भएको जिल्ला प्रहरी कार्यालय झापाले जनाएको छ । स्कुटर पछाडि सवार झापा गाउँपालिका–२ का १८ वर्षीय सुशान्त थापा र वडा नं ७ बस्ने १७ वर्षीय निशान शिवाकोटीको बीएण्डसी अस्पतालमा उपचार भइरहेको छ ।