विष्णुप्रसाद पोखरेल
दमक, भदौ २३ गते । झापाको कमल गाउँपालिका–३ बगानेटोल क्याम्पा सडकमा भएको मोटरसाइकल दुर्घटनामा एक व्यक्तिको ज्यान गएको छ । शनिवार बिहान ११ बजेतिर मे २ प ५९२३ नम्बरको मोटरसाइकल र विपरीत दिशाबाट आउँदैगरेको मे ११ प ९२०३ नम्बरको मोटरसाइकल एकआपसमा ठोक्किएर दुर्घटना भएको हो ।
दुर्घटनामा मे २ प ५९२३ नम्बरको मोटरसाइकलमा सवार स्थानीय ३० वर्षीय वीरेन्द्र सहनीको मृत्यु भएको प्रहरी चौकी केर्खाका इन्चार्ज रामकाजी कटुवालले बताउनुभयो ।
सो दुर्घटनामा गम्भीर घाइते हुनुभएका सहनीको उपचारका लागि लाइफ लाइन अस्पताल दमकमा लगिएको थियो । अस्पताल पुग्नासाथ सहनीको मृत्यु भएको प्रहरीले जनाएको छ । अर्का मोटरसाइकल चालक रामभगत बुढाथोकीलाई सामान्य चोट लागेको प्रहरीको भनाइ छ ।
