संयुक्त राष्ट्रसङ्घ, असार १७ गते । उत्तरी गाजा पट्टीका लागि जारी इजरायली नयाँ निकासी आदेशको निन्दा गर्दैै संयुक्त राष्ट्रसङ्घका महासचिव एन्टोनियो गुटेरेसले पछिल्लो इजरायली आक्रमणबाट ज्यान गुमाएकोप्रति चिन्ता व्यक्त गर्नुभएको छ । “नागरिकहरूलाई सम्मान र संरक्षण गरिनुपर्छ”, गुटेरेसका प्रमुख प्रवक्ता स्टेफन डुजारिकले भन्नुभयो ।
सबै बन्धकहरूको तत्काल, बिना शर्त रिहाइको आह्वान गर्दै डुजारिकले भन्नुभयो, “महासचिवले मध्यस्थकर्ताहरूको निरन्तर प्रयासलाई पनि स्वागत गर्दै गाजामा स्थायी युद्धविराममा पुग्न आफ्नो अपिल दोहोर्याउनुभएको छ ।”प्यालेस्टिनी चिकित्सा र सुरक्षा स्रोतहरूले सोमबार गाजा सहरको समुद्र तटमा रहेको क्याफेमा इजरायली हवाई आक्रमण हुँदा कम्तीमा २१ जनाको मृत्यु भएको र दर्जनौँ घाइते भएको बताएका छन् ।
आक्रमणपछि अस्पतालमा ल्याइएका अधिकांश पीडित महिला र बालबालिका रहेको अल-सिफाले एक संक्षिप्त विज्ञप्तिमा जनाएको छ । मानवीय मामिला समन्वयका लागि संयुक्त राष्ट्रसङ्घको कार्यालय (ओसिएचए) ले गाजाको अधिकांश भाग विस्थापनको आदेशमा रहेको बताएको छ । कब्जा गर्ने शक्तिका रूपमा इजरायलले नागरिकहरू जहाँ भए पनि र जहाँ गए पनि उनीहरूको सुरक्षा सुनिश्चित गर्नुपर्ने ओसिएचएले बताएको छ ।
“मानिसहरूलाई भिडभाड भएको क्षेत्रमा धकेलिएको छ, जहाँ हजारौँ अन्य पहिले नै बसिरहेका छन्”, ओसिएचएले आइतबारको विस्थापन आदेशबारे भनेको छ, “यी ठाउँमा आश्रय, पानी र ढल प्रणाली र चिकित्सा सुविधाहरूको अभाव छ ।” कार्यालयका अनुसार सप्ताहन्तमा चलिरहेको इजरायली सैन्य कारबाहीको बिचमा खानाको पर्खाइमा समेत धेरै मानिस मारिए र घाइते भएका छन् ।
मध्य गाजाका लागि सप्ताहन्तमा पहिलेको विस्थापन आदेशपछि इजरायलीहरूले जबल्या र गाजा सहरका क्षेत्रका गाजावासीहरूलाई अल मवासी जान निर्देशन दिएको मानवतावादीहरूले बताएका छन् । आइतबारको आदेशबाट मात्रै विस्थापित हुने क्षेत्रमा दर्जनौँ अस्थायी विस्थापन स्थलहरूमा बसोवास गर्ने परिवारहरूसहित लगभग एक लाख ५० हजार मानिस थिए ।
ओसिएचएले गाजाभरि आपूर्ति ल्याउन र मानवीय कार्यहरू गर्नमा भारी अवरोधहरू बिच मानिसहरू भोकै रहेको बताएको छ । विश्व खाद्य कार्यक्रम (डब्लुएफपी) का अनुसार पाँचमध्ये एक जना मानिसले विनाशकारी भोकमरीको सामना गरिरहेको र ९० हजारभन्दा बढी महिला र बालबालिकालाई कुपोषणका लागि तत्काल उपचार आवश्यक छ ।
डब्लुएफपीले यस क्षेत्रमा एक लाख ३० हजार मेट्रिक टन खाना राखिएको र पहुँच प्रदान गरिएमा गाजामा मानिसहरूलाई सेवा दिन तयार रहेका बताएको छ । संयुक्त राष्ट्रसङ्घका मानवतावादीहरू र उनीहरूका साझेदारहरूले इजरायली अधिकारीहरूलाई तत्काल इन्धनलाई गाजामा प्रवेश गर्न अनुमति दिन आह्वान गरेका छन् ।
“यो अस्पताल, पानी र सरसफाइ उपकरण, दूरसञ्चार, सीमाबाट कार्गो सार्ने र सामुदायिक भान्सा सञ्चालन गर्ने जस्ता जीवन बचाउने कार्यका लागि अत्यन्त आवश्यक छ”, ओसिएचएले भनेको छ, “यदि इन्धनमा प्रतिबन्ध जारी रह्यो भने, यी महत्त्वपूर्ण सेवाहरूमध्ये धेरै चाँडै र केही क्षेत्रहरूमा चाँडै बन्द हुने छन् ।” कार्यालयका अनुसार इजरायली अधिकारीहरूले धेरै मानवीय आन्दोलनलाई अस्वीकार गर्न जारी राखेका छन् ।
ओसिएचएले ठोस फोहोर र भग्नावशेष हटाउने र बिग्रिएका ट्रकहरू पुनःप्राप्त गर्ने प्रयाससहित सहायता आन्दोलन समन्वय गर्ने विश्व निकायको १५ मध्ये पाँच वटा प्रयासलाई अस्वीकार गरेको बताएको छ । अवरोधका कारण वा आयोजकहरूले तिनीहरूलाई रद्द गर्नुपरेका कारण अन्य दुई मिसन सम्पन्न भएका छैनन् । कर्मचारीहरूको आवागमन र अन्य मिसनसहित बाँकी आठ मिसन पूरा भएका छन् ।
शिक्षामा काम गरिरहेका यसका साझेदारहरूले विद्यालय जाने उमेरका बालबालिकाहरूले निरन्तर सिकाइ गुमाउने गरेको रिपोर्ट गरेको कार्यालयले जनाएको छ । आइतबार जारी गरिएको विस्थापन आदेशले पाँच हजार विद्यार्थी र दुई सय शिक्षकसहित एक दर्जनभन्दा बढी अस्थायी सिकाइ स्थलहरूलाई असर गरेको छ । विस्थापन आदेश र विद्यालयहरूमा व्यापक क्षतिको बिचमा गाजाका अधिकांश बालबालिका शिक्षामा पहुँच नभएकाले बालबालिकाको भविष्य अन्धकारमा छ । अन्य ओसिएचए साझेदारहरूले विगत दुई महिनामा लैङ्गिक-आधारित हिंसाको बढ्दो जोखिमको रिपोर्ट गरेका छन् । रासस/सिन्ह्वा
