दुई महिलामाथि बाघको आक्रमण

बोमलाल गिरी

नवलपुर, साउन २९ गते । नवलपुरको विनयी त्रिवेणी गाउँपालिकामा बाघले आक्रमण गरी दुई महिलालाई घाइते बनाएको छ । सोमबार दिउँसो विनयी त्रिवेणी गाउँपालिका वडा नम्बर १ सिसेनीकी ४० वर्षीया पिथिमा दर्लामी र सोही ठाउँकी कीर्तिमा दर्लामीलाई बाघले आक्रमण गरेको हो ।

भेडावन उपभोक्ता समितिको सामुदायिक बनमा घाँस काट्न जाने क्रममा बाघले आक्रमण गरी घाइते बनाएको नवलपुर प्रहरीले जनाएको छ । उहाँहरूलाई बाघले दाहिने हातको पाखुरा र दाहिने हिपमा नग्रांले चिथोरेको नवलपुरका प्रहरी उपरीक्षक वेदबहादुर पौडेलले जानकारी दिनुभयो । 

घाइते दुवै महिलाको मध्यविन्दु नगरपालिकामा रहेको विश्व मेडिकलमा प्राथमिक उपचार पछि मध्यविन्दु जिल्ला अस्पताल पुर्‍याइएको थियो । घाइतेलाई जिल्ला अस्पतालले चितवन रिफर गरेको छ । अहिले उहाँहरूको पुरानो मेडिकल कलेज चितवनमा उपचार भइरहेको छ ।