ठाडो शिर (कविता)

तपाईं प्रचारप्रसार गरिरहनुहोस्

म नगरिरहुँला

तपाईं बाँचिरहनुहोस्

म मरिरहुँला ।

तपाईं पिठो बेचिरहनुहोस्

म चामल रुङिरहुँला

तपाईं झुमिरहनुहोस्

म उङिरहुँला ।

तपाईं खुसी भइरहनुहोस्

म नभइरहुँला

तपाईं उफ्रिरहनुहोस्

म कुप्रिरहुँला ।

तपाईं बाङ्गोटिङ्गो हिँडिरहनुहोस्

म सोझै बाटो हिँडिरहुँला

तपाईं छिट्टै पुग्नुहोस्

म ढिलै पुगुँला ।

मुख्य कुरो ‘शिर’को न हो

तपाईं कहिले झुक्नु होला

कहिले चुक्नु होला

कहिले लुक्नु होला

मेरो शिर भने सधैँ ठाडो

बाँचे पनि ठाडो

मरे पनि ठाडो ।