बाजुरा समाचारदाता
बाजुरा, असार १७ गते । खप्तड छेडेदह गाउँपालिका–५, डोगडीका दुई दाजुभाइ भारतबाट नेपाल आउने क्रममा बेपत्ता भएका छन् । भारतको उत्तराखण्ड राज्यको पौडीपावौबाट घर फर्किंदै गरेका ४० वर्षीय अर्जुन रावत र ३४ वर्षीय टेकबहादुर रावत विगत एक महिनादेखि बेपत्ता छन् ।
गत जेठ ३ बाट सम्पर्कविहीन भएको अर्जुनकी श्रीमती जाना रावतले बताउनुभयो । उहाँले भन्नुभयो, “बेपत्ता भएका श्रीमान् र देवरले घर आउने दिनमा पावौबाट ऋषिकेश जाने बसमा आउँदै गरेको बताउनुभएको थियो । सो खबर आएको तीन घण्टापछि दाजुभाइ नै सम्पर्कविहीन हुनुभयो ।” बेपत्ता दाजुभाइको खोजी गरिदिनका लागि पीडित परिवारले स्थानीय सरकार, प्रदेश र सङ्घीय सरकारलाई समेत हारगुहार गर्दै आएका छन् । छोराछोरी पढाउन र घर खर्च धान्नकै लागि रावत दाजुभाइ गत मङ्सिरमा कामको खोजीमा भारतको पौडीमा पुग्नुभएको थियो । छेडेदह गाउँपालिका उपाध्यक्ष बिसु नाथले बेपत्ता रावत दाजुभाइको खोजी कार्यका लागि विभिन्न निकायसँग पहल भइरहेको बताउनुभयो ।
खोलाले बगाउँदा महिलाको मृत्यु
खप्तड छेडेदह गाउँपालिकामा खोलाले बगाउँदा गवानीकी २३ वर्षीय सङ्गीता साउदको मृत्यु भएको छ । झिगिने बार्जुगाड खोला तर्ने क्रममा साउदलाई बगाएको हो । नौ वर्षीय छोरीलाई काखमा राखेर खोला तर्ने क्रममा छोरीलाई खोलाले साइड लगाउँदा बाँच्न सफल भएको तर आमालाई खोलाले बगाएको जिल्ला प्रहरी कार्यालय बाजुराले जनाएकोे छ ।
