.jpg)
सिराज खान
नेपालगञ्ज, जेठ १० गते । थालेसेमियाका बिरामीलाई आवश्यक पर्ने आइरन चिलेटर (डिफेरासिरोक्स) नामक औषधि भेरी अस्पतालमा पहिलो पटक निःशुल्क वितरण गरिएको छ । बिरामीले रगत चढाएपछि प्रयोग गर्नुपर्ने एउटै ट्याबलेटको १५० रुपियाँसम्म पर्ने सो औषधि अस्पतालमा उपचारका लागि आउने बिरामीले यसअघि आफैले किन्थे ।
भेरी अस्पतालका प्रमुख कन्सल्टेन्ट फिजिसियन डा. राजन पाण्डेले नेपाल सरकारले बजेट पठाएसँगै अस्पतालले थालेसेमियाका बिरामीलाई औषधि निःशुल्क दिन सुरु गरेकोे जानकारी दिनुभयो ।उहाँले यो औषधि बच्चाको ओपीडीमा निःशुल्क पाइने बताउनुभयो । डा. पाण्डेका अनुसार अतिनै महंगो भएका कारण धेरै बिरामीले यो औषधि खान पाएका थिएनन् । चिकित्सकका अनुसार थालेसेमियाका बिरामीलाई रगत चढाउनु पर्ने भएकाले बढी रगत चढाउँदा आइरन ओभरलोड भएर कलेजो, मुटुको समस्या हुने जोखिम बढी हुन्छ ।
कन्सल्टेन्ट फिजिसियन डा. पाण्डेले भन्नुभयो– ‘२० पिन्टभन्दा बढी रगत चढाएपछि शरीरमा आइरन ओभरलोड हुन्छ । त्यहीँ भएर डिफेरासिरोक्स औषधि नियमित खानुपर्छ । तर महंगो पर्ने भएकाले अधिकांश बिरामीहरुले किन्न नसकेर औषधि खाने गर्दैनथे र खाए भने केही समयमै छाड्ने गर्थे ।’
नेपालगञ्जस्थित भेरी अस्पताल, मेडिकल कलेज, कान्ति आरोग्यलगायतका अस्पतालमा एक सयको हाराहारीमा थालेसेमियाका बिरामीले उपचार सेवा लिइरहेका छन् । बंशाणुगत यो रोगका कारण खासगरी थारु समुदायका बालबालिकाहरु बढी प्रभावित छन् । भेरी अस्पतालले निःशुल्क डिफेरासिरोक्स औषधि दिन सुरु गरेपछि थालेसेमियाका बिरामीलाई राहत मिलेको छ ।
