कमल शर्मा
दैलेख, माघ २७ गते । महावु गाउँपालिकाका अध्यक्ष लछुमन गुरुङको मृत्यु भएको छ । ७९ वर्षिय गुरुङको जिल्ला अस्पताल दैलेखमा उपचारका क्रममा आज मृत्यु भएको हो ।
जिल्ला अस्पताल दैलेखका डा. सुशिला कटुवालले उपचारको क्रममा मृत्युभएको जानकारी दिनुभयो । उहाँले भन्नुभयो, “जिल्ला स्वास्थ्य सेवा कार्यालयमा ल्याँउदा उहाँको अवस्था अन्तिम अवस्था थियो, बँचाउने कोशिस गरे पनि सम्भव भएन ।”
महावु गाउँपालिकाका लेखा अधिकृत खगेन्द्र बिसीले बिहीबार गाउँपालिकामा आयोजना गरेको कार्यक्रममा सहभागी हुँदैगर्दा स्वास्थ्यमा समस्या भएपछि जिल्लामा आएर औषधि लिएर घर फर्केको जानकारी दिनुभयो । “आज उपचारका लागि काठमाडौं जाने तयारी गरी गाउँपालिकाबाट हिड्नु भएको हो, बीच बाटोमै दुखद घटना घटेछ” उहाँले भन्नुभयो ।
अध्यक्ष गुरुङलाई सुगर प्रेसरजस्ता कुनै पनि समस्या नभएको उहाँका छोरा बिनय गुरुङले जानकारी दिनुभयो । नेपाली कांग्रेसका महाधिबेशन प्रतिनिधि समेत रहनुभएका गुरुङ २०७९ बैशाखमा भएको स्थानीय तहको निर्वाचनमा एमालेका उम्मेदवारलाई पराजीत गरी बिजयी हुनुभएको थियो ।
