अमरगढी समाचारदाता
डडेल्धुरा, माघ २७ गते । पहिलो पटक भूमिहीन सुकुम्बासीलाई लालपुर्जा वितरण गरिएको छ। जग्गा नापजाँचको काम सकिएपछि राष्ट्रिय भूमि आयोगले लालपुर्जा वितरण गर्न थालेको हो।
बुधबार आलीताल गाउँपालिका–८ का २१ भूमिहीन सुकुम्बासी परिवारलाई जग्गाधनी प्रमाणपत्र (लालपुर्जा) वितरण गरिएको राष्ट्रिय भूमि आयोग डडेल्धुराका अध्यक्ष शेर भण्डारीले जानकारी दिनुभयो। भूमिहीन सुकुम्बासी परिवारलाई आलीताल गाउँपालिका–८ को कार्यालयमा बोलाई लालपुर्जा वितरण गरिएको उहाँले बताउनुभयो।
आलीताल गाउँपालिकामा अव्यवस्थित, भूमिहीन सुकुम्बासीको सङ्ख्या करिब दुई हजार छ। आठवटा वडा रहेको आलीताल गाउँपालिकामा जग्गा नापजाँचको काम सकिएपछि सबैलाई लालपुर्जा वितरण गरिने गाउँपालिका अध्यक्ष शेरसिंह पार्कीले बताउनुभयो। आलीतालमा लालपुर्जा उपलब्ध गराउन वडा नं. ८ बाट जग्गा नापजाँचको काम थालिएको थियो। केही दिनभित्रै वडा नं. ४ र ५ मा समेत लालपुर्जा वितरण हुने अध्यक्ष पार्कीले बताउनुभयो।
राष्ट्रिय भूमि आयोगले देशभरका भूमिहीन सुकुम्बासी तथा अव्यवस्थित बसोबासीलाई व्यवस्थित गर्न जग्गाको नापजाँच गर्दै प्रमाणीकरण गरी लालपुर्जा वितरण गरिरहेको छ।
“जमिन थियो, लालपुर्जा थिएन। कमाइ खाइरहेको जमिनबाट सरकारले हटाउँछ कि भन्ने चिन्ता हुन्थ्यो तर अहिले लालपुर्जा पायौँ, निकै खुसी लगोको छ,” स्थानीय मानबहादुर मगरले भन्नुभयो, “लालपुर्जा नहुने पीर अब हटेको छ।”
डडेल्धुरामा पहिलो पटक आलीतालबाट लालपुर्जा वितरणको काम सुरु गरिएको हो। राष्ट्रिय भूमि आयोगले स्थानीय सरकारसँग सम्झौता गरी आलीताल गाउँपालिकासँगै भागेश्वर गाउँपालिका र परशुराम नगरपालिकामा जग्गा नापजाँच गरिरहेको छ। अमरगढी नगरपालिका, भागेश्वर, नवदुर्गा र अजयमेरु गाउँपालिकामा नापजाँचको काम सुरु गर्ने तयारीमा रहेको भूमि आयोगका अध्यक्ष भण्डारीको भनाइ छ।
