ट्याक्टर दुर्घटनामा एकको मृत्यु, तीन घाइते

सुजन काफ्ले
चरीकोट, माघ २३ गते । दोलखामा ट्याक्टर दुर्घटना हुँदा एक जनाको मृत्यु भएको छ भने तीन जना घाइते भएका छन् । जिल्लाको बिगु गाउँपालिका–४ लादुकमा आज (सोमबार) दिउँसो ट्याक्टर दुर्घटना हुँदा एक जनाको मृत्यु भएको हो । मृत्यु हुनेमा २४ वर्षीय किसन सार्की हुनुहुन्छ ।

जिल्ला प्रहरी कार्यालय दोलखाका प्रहरी निरीक्षक राजेश सिग्देलले सिंगटी लादुक सडकखण्डअन्तर्गत चित्रेस्थित रमिते गोलाईमा ढुङ्गा लोड गरेको ट्याक्टर हुँदा अन्य तीन जना घाइते भएको जानकारी दिनुभयो ।

प्रहरी निरीक्षक सिग्देलका अनुसार घाइते हुनेमा २५ वर्षीय जीवन नेपाली, २३ वर्षीय रामबहादुर नेपाली र १८ वर्षीय सुरज खत्री रहेका छन् ।

घाइतेमध्ये जीवन र रामको दोलखा धुलिखेल अस्पतालमा उपचार भइरहेको छ भने सुरजको सिँगटामा उपचार भइरहेको प्रहरीले जनाएको छ । दुर्घटनाबारे थप अनुसन्धान भइरहेको प्रहरीले जनाएको छ ।