काठमाडौँ, पुस ४ गते । वरिष्ठ मुटुरोग विशेषज्ञ डा. ओममूर्ति अनील सम्मानित हुनुभएको छ। नेपाल हृदयरोग निवारण प्रतिष्ठानले यस वर्षको ‘मृगेन्द्र सम्झना चिकित्सा गुठी वक्ता (ओरेसन) सम्मान–२०७९’द्वारा उहाँलाई सम्मानित गरिएको हो।
प्रतिष्ठानको ३१औँ वार्षिक साधारण सभामा आयोजित कार्यक्रममा बनेपा नगरपालिकाका प्रमुख शान्तिरत्न शाक्य, मृगेन्द्र सम्झना चिकित्सा गुठीका अध्यक्ष डा. मृगेन्द्रराज पाण्डे र प्रतिष्ठानका अध्यक्ष बलराम न्यौपानेले डा. अनीललाई सम्मान गर्नुभयो। प्रतिष्ठानका अध्यक्ष न्यौपानेले मुटुरोग नियन्त्रण गर्न डा. अनीलले ठूलो सहयोग गरेको बताउँदै सामान्य नागरिकलाई पनि मुटुरोगबारे सचेत गराइरहने भएकाले सम्मान गरिएको बताउनुभयो।
डा. अनीललाई प्रतिष्ठानले मुटुरोग निवारणको क्षेत्रमा उपचारात्मक एवं प्रतिकारात्मक दुवै क्षेत्रमा विशिष्ट योगदान पु-याउँदै जनसमुदायलाई मुटुरोगको पीडाबाट बचाउने कार्य एवं मुटुरोगसम्बन्धी अनुसन्धानात्मक कार्यमा क्रियाशील रहेको भन्दै सम्मान गरेको हो। सम्मानित भएपछि डा. अनीलले आफू निरन्तर मुटुरोग निवारणको क्षेत्रमा क्रियाशील रहेको बताउँदै सम्मानले आफूलाई मुटुरोग निवारणको क्षेत्रमा थप योगदान गर्न हौसला मिलेको बताउनुभयो।
