वसन्त पराजुली
वसन्त पराजुली
भरतपुर मङ्सिर ५ गते । आइतबार सम्पन्न प्रतिनिधि र प्रदेश सभा सदस्य निर्वाचनको मतगणना सुरु हुने भएको छ । चितवनको तिनै क्षेत्रमा एकै पटक मत गणना सुरु गर्न लागिएको हो ।
सर्वदलीय बैठक सकेर मतगणना गर्ने गरी कर्मचारीलाई समेत तयारी अवस्थामा राखिएको चितवन क्षेत्र नम्बर १ का निर्वाचन अधिकृत रेसम सिग्देलले जानकारी दिनुभयो । “हामी अहिले सर्वदलीय बैठक बस्दै छौ । यो बैठक सकिए लगत्तै मतगणना सुरु गछौ”, उहाँले भन्नुभयो । उहाँले सङ्घीय र प्रदेश तर्फको मत छुट्टाछुट्टै रूपमा एकै पटक मतगणना गर्ने तयारी गरी रहेका छौ”, उहाँले भन्नुभयो ।चितवन क्षेत्र नम्बर २ का सहायक निर्वाचन अधिकृत ईश्वर आचार्यले केही बेरमै मतगणना सुरु गरिने बत्ताउनुभयो । “हामी ९ देखि १० बजे भित्र मतगणना सुरु गछौ । मतगणनाका लागि तयारी अवस्थामा छौ”, उहाँले भन्नुभयो ।
चितवन क्षेत्र नम्बर ३ का सहायक निर्वाचन अधिकृत पुरुषोत्तम पौडेलले पनि बिहान नौ बजेदेखि मतगणना सुरु हुने जानकारी दिनुभयो । चितवन १ को पूर्वी चितवनको खैरहानीमा अवस्थित खैरहानी माध्यमिक विद्यालयमा, क्षेत्र नम्बर २ को भरतपुर स्थित औद्योगिक प्रदर्शनी केन्द्रमा र क्षेत्र नम्बर ३ को रामपुर स्थित कृषि तथा वन विश्व विद्यालयमा निर्वाचन सकिए लगत्तै मतपेटिका जम्मा गरेर राखिएको छ । चितवनमा १६२ वटा मतदान स्थलका ४६० वटा मतदान केन्द्रका मत पेटिका आइतबार साँझ नै मतगणना स्थलमा ल्याइएको बताइन्छ ।
चितवनमा ६५ प्रतिशत मत खसेको थियो । चार लाख ८ हजार ३४२ मतदाता रहेको चितवनमा दुई लाख ६४ हजार मत खसेका चितवनका प्रमुख जिल्ला अधिकारी आसमान तामाङले जानकारी दिनुभयो ।
