काठमाडौं, भदौ २५ गते । प्रधानमन्त्री शेरबहादुर देउवाले बेलायती महारानी एलिजावेथ द्वितीयाको निधनप्रति गहिरो दुः ख व्यक्त गर्नुभएको छ ।
शनिबार बिहान लैचचाैरस्थित बेलायती राजदूतावासमा राखिएको शोक पुस्तिकामा हस्ताक्षर गर्नुहुँदै प्रधानमन्त्री देउवाले महारानीको निधनप्रति गहिरो दुःख व्यक्त गर्नुभएको हो ।
बेलायतमा सबैभन्दा लामो ७० वर्ष राजकाज सम्हाल्नुभएका महारानीको बिहीबार ९६ वर्षको उमेरमा निधन भएको थियो ।
यसअघि ट्विटरमार्फत प्रधानमन्त्री देउवाले दिनुभएको शोक सन्देशमा महारानी एलिजावेथमा अन्य संस्कृति र मानवताप्रतिको दया, सादगी र सम्मान जस्ता गुणहरु रहेका कारण नेपाली जनताले महारानीलाई मायापूर्वक सम्झन्छन्, भन्नुभएको थियो ।
प्रधानमन्त्रीको सन्देशमा भनिएको छ, ‘‘उहाँको निधनले नेपाल र नेपाली जनताले एक महान् प्रशंसक गुमाएको छ, म राजपरिवारप्रति गहिरो समवेदना व्यक्त गर्दछु ।’’
रानी एलिजावेथ द्वितीयाले सन् १९६१ र १९८६ मा दुई पटक नेपालको औपचारिक राजकीय भ्रमण गर्नुभएको थियो ।
राष्ट्रपति विद्यादेवी भण्डारीले बेलायतका महारानी एलिजाबेथ द्वितीयाको निधनप्रति दुःख व्यक्त गर्दै शुक्रबार नै लैनचौरमा रहेको नेपालस्थित बेलायती राजदूतावासमा पुगेर त्यहाँ राखिएको शोक पुस्तिकामा हस्ताक्षर गर्नुभएको थियो ।
