खार्तुम, फागुन २४ गते । दक्षिणपश्चिम सुडानको अर्धसैनिक नियन्त्रणमा रहेको दुई बजारमा ड्रोन आक्रमण हुँदा कम्तीमा ३३ जनाको मृत्यु भएको छ भने दर्जनौँ घाइते भएका छन् । यो आक्रमण पश्चिम कोर्डोफान राज्यको अबु जाबाद र वाड बान्डा बजारमा भएको हो, जुन तीन वर्षदेखि चलिरहेको सुडानी सेना र अर्धसैनिक र्यापिड सपोर्ट फोर्स (आरएसएफ) बिचको सङ्घर्षको सबैभन्दा हिंस्रक क्षेत्रमा पर्दछ ।
अबु जाबाद अस्पतालका एक चिकित्सकले शनिबार बजारमा दुई वटा ड्रोन प्रहार भएको र ५९ जना घाइते भएको जानकारी दिनुभयो । उहाँका अनुसार तीमध्ये ३० जना घाइतेको तत्काल उपचार भइरहेको छ । सहरका बासिन्दा हमाद अब्दुल्लाले घटनामा उहाँका चार आफन्त पनि मारिएका बताउनुभयो, जो बजारमा काम गर्दै थिए ।
सैन्य स्रोतले आक्रमणमा सर्वसाधारणलाई लक्षित गरिएको आरोपलाई अस्वीकार गर्दै भने, “हामी केवल विद्रोही र उनीहरूको हतियार डिपोलाई मात्र निशाना बनाउँछौँ । कुनै पनि आधार नभएको आरोप फैलाइएको छ ।” अप्रिल २०२३ देखि सुरु भएको युद्धमा दुवै पक्षमाथि नागरिक क्षेत्रमा गोलाबारी गर्ने र युद्ध अपराध गर्ने आरोप लगाइएको छ ।
युद्धका कारण दशौँ हजार व्यक्तिको मृत्यु भइसकेको छ भने एक करोड १० लाखभन्दा बढी मानिस विस्थापित भएका छन् । संयुक्त राष्ट्रसङ्घले यसलाई विश्वकै सबैभन्दा ठुलो विस्थापन र भोकमरी सङ्कटका रूपमा वर्णन गरेको छ । स्थानीय बासिन्दा र चिकित्सकले पनि बढ्दो हिंसाले दैनिक जीवन प्रभावित भएको र उपचार सुविधामा दबाब परेको बताएका छन् ।
दुई बजार सहर एक अर्काबाट लगभग १५ किलोमिटर (९ माइल) टाढा छन् । सुडानको यस क्षेत्रमा जारी हिंसा र ड्रोन प्रयोगले मानवीय सङ्कटलाई अझ गहिरो बनाएको छ । नागरिक सुरक्षा र राहत प्रयासमा चुनौती बढेको भन्दै अन्तर्राष्ट्रिय समुदायले चासो देखाउँदै आएको छ । रासस/एएफपी
