जेनिथलाई बास्केटबल उपाधि

काठमाडौं, साउन १ गते । न्यु जेनिथ ‘बी’ ले प्रथम एन्जल्स एसइइ कप थ्री अन थ्री छात्र बास्केटबल प्रतियोगिताको उपाधि जितेको छ । मनमैजुस्थित आयोजक एन्जल्स हार्ट माविको कोर्टमा आइतबार भएको फाइनल खेलमा न्यु जेनिथ ‘बी’ ले ऋत एकेडेमीलाई १८–१५ ले हरायो । 

उपाधिसँगै जेनिथले १० हजार रुपियाँ पुरस्कार पायो । उपविजेता ऋतले सात हजार रुपियाँ पुरस्कार प्राप्त गरेको छ । न्यु जेनिथ ‘बी’ का अमृत भट्टराई ‘मोस्ट भेलुएबल प्लेयर’ घोषित हुनुभयो । 

विजेतालाई समाजसेवी बाबुराम पौडेल, एन्जल्स हार्ट एजुकेसन फाउन्डेसनका प्रालिका अध्यक्ष लीलबहादुर पुन, प्रा.डा. लोकेन्द्रबहादुर शेरचनलगायतले पुरस्कार प्रदान गर्नुभयो । दुईदिने प्रतियोगितामा ६६ टिमले नकआउट आधारमा प्रतिस्पर्धा गरेका थिए ।