रवीन्द्र उप्रेती
बर्दिबास, माघ ७ गते । आसन्न प्रतिनिधिसभा सदस्य निर्वाचनका लागि महोत्तरीको चारवटै निर्वाचन क्षेत्रमा मनोनयन दर्ता गराएका उम्मेदवारविरुद्ध कुनै पनि उजुरी नपरेको जनाइएको छ ।
महोत्तरीका चार निर्वाचन क्षेत्रमा प्रतिनिधिसभा सदस्यका लागि मंगलबार १९ महिलासहित १४३ जनाको मनोनयन दर्ता भएको थियो । मनोनयन दर्तापछि चारै क्षेत्रका निर्वाचन अधिकृतको कार्यालयले बिहान १० बजेदेखि अपरान्ह ३ बजेसम्म उम्मेदवारविरुद्ध दाबी–विरोध तथा उजुरी दर्ता गर्न सकिने समय तोकेको थियो ।
निर्धारित समयभित्र उजुरी संकलनका लागि निर्वाचन कर्मचारी समयमै कार्यालयमा उपस्थित भए पनि कुनै पनि निर्वाचन क्षेत्रमा उम्मेदवारविरुद्ध दाबी–विरोध, उजुरी नपरेको मुख्य निर्वाचन अधिकृत माधवप्रसाद अधिकारीले जानकारी दिनुभयो ।
दाबी–विरोध नपरेकाले अब पूर्व निर्धारित निर्वाचन तालिकाअनुसार बाँकी प्रक्रिया अघि बढाइने भएको छ । मुख्य निर्वाचन अधिकृत अधिकारीका अनुसार मनोनयनपत्रमाथि जाँचबुझ गरी ८ गते बिहीबार उम्मेदवारको नामावली प्रकाशित गरिने छ ।
त्यसपछि ९ गते शुक्रबार उम्मेदवारले नाम फिर्ता लिन सक्नेछन् । सोही दिन उम्मेदवारको अन्तिम नामावली तथा निर्वाचन चिन्ह प्रकाशित गरिने उहाँले बताउनुभयो । दाबी–विरोध नपरेको अवस्थामा बाँकी सबै कामहरू तय कार्यक्रमअनुसार अघि बढाइने निर्वाचन अधिकृतको कार्यालयले जनाएका छन् ।
