आगजनीबाट ध्वस्त घरअगाडि पत्रकार सम्मेलन

सुर्खेत समाचारदाता

सुर्खेत, असोज ९ गते । कर्णाली प्रदेशका प्रदेश अस्पतालका पूर्वनिर्देशक डा. डम्बर खड्काले आफू राजनीतिक गतिविधिमा संलग्न नभए पनि जेनजी पुस्ताको आन्दोलनका क्रममा आफ्नो घरमा आगजनी गरेर ध्वस्त बनाइदिएको गुनासो गर्नुभयो । 

जेनजी पुस्ताले आन्दोलनका क्रममा गत भदौ २४ गते वीरेन्द्रनगर नगरपालिका–७ स्थित इत्राममा नवनिर्मित घरमा आगजनी गरी पूर्ण रूपमा नष्ट गरिदिएको छ । डाक्टर खड्का कांग्रेस केन्द्रीय उपसभापति एवं पूर्वरक्षामन्त्री पूर्णबहादुर खड्काका माइलो भाइ हुनुहुन्छ । डाक्टर खड्काको घरमा मात्र होइन, पूर्णबहादुर खड्काका साइलो भाइ एवं कांग्रेस सुर्खेतका उपसभापति विष्णुबहादुर खड्काको घरमा पनि जेनजी पुस्ताको आन्दोलनको भिडले आगजनी, तोडफोड गरेको छ ।  

दुई सातापछि आगजनीबाट ध्वस्त भएको घरअगाडि पत्रकार सम्मेलन गर्दै उहाँले ४१ वर्षको आफ्नो मेहनतको कमाईबाट बनाएको घर जलाएको, तोडफोड गरेको र लुटपाट गरेको बताउनुभएको छ । 

उहाँले आफ्नो घरबाट जिल्ला प्रहरी कार्यालयको दुरी एक सय मिटर मात्रै रहेको भन्दै उहाँले सुरक्षाकर्मीले जनताको जनधनको सुरक्षा गर्नुपर्ने कर्तव्य बिर्सिंदा यस्तो क्षति भएको गुनासो गर्नुभयो । उहाँले भन्नुभयो, “नजिकै प्रहरी कार्यालय छ, बेलैमा सुरक्षाकर्मी पठाइदिएको भए यस्तो क्षति हुने थिएन, सुरक्षाकर्मीले आफ्नो कर्तव्य बिर्सिए ।” 

उहाँले आफ्नो घरमा आगो लगाउने, लुटपाट र तोडफोड गर्ने जेनजी पुस्ता नभएको दाबी गर्नुभयो । आफ्नो पुख्र्यौली सम्पत्ति, डाक्टरी पेसाबाट कमाएको पैसाले बनाएको घर, दुई वटा गाडी, लुगाफाटा, नगद, गहना सबै लुटेर लगेको भन्दै डाक्टर खड्काले गुनासो गर्नुभयो । यति हुँदाहुँदै पनि आफू कहीँ पलायन नहुने र बाँचुन्जेल सुर्खेतमै बसेर बिरामीको सेवा गर्ने उहाँले प्रतिबद्धता जनाउनुभयो । 

कर्णाली जस्तो दुर्गम ठाउँमा बसेर धेरैको ज्यान बचाएको, निःशुल्क सेवा गरेको बदलामा आफ्नो घर सम्पत्ति जलाउनु दुःखद भएको उहाँको भनाइ छ । उहाँले आफूहरूले कुनै भ्रष्टाचार नगरेको, कसैलाई दुःख दिएर कमाएको नभई पुख्र्यौली सम्पत्ति, पेसागत आम्दानीबाट दुःखले कमाएको सम्पत्तिमा आगो लगाउनेलाई कुनै दिन यस्तै हविगत भोग्नुपर्ने उल्लेख गर्नुभयो । 

यस्तै नेपाली कांग्रेस सुर्खेतका उपसभापति एवं डा. डम्बर खड्काका भाइ विष्णुबहादुर खड्काले राजनीतिक गर्ने व्यक्तिले आफ्नो पेसा, व्यवसाय गर्न पनि नपाउने अवस्था आएकोमा चित्त दुखाउनुभयो । उहाँले सुर्खेतमा हुने विभिन्न आन्दोलनका क्रममा आफूहरूको घर जहिले पनि आन्दोलनकारीको निशानामा पर्ने गरेको भन्दै यस्तो घर अरू राजनीतिकर्मीमा नहुने तर आफूहरूको मात्रै हुने गरेकोमा आक्रोश पोख्नुभयो । 

उहाँहरूको घरको मूल्याङ्कन हुन बाँकी रहेको छ । सरकारी मूल्याङ्कन समितिले सरकारी कार्यालयको क्षतिको विवरण सङ्कलन गरिरहेको र अब व्यक्तिगत घरको क्षतिको विवरणको मूल्याङ्कन गर्ने तयारी गरेको जनाएको छ ।