गोरखापत्र समाचारदाता
काठमाडौँ, भदौ १४ गते । सङ्घीय मामिला तथा सामान्य प्रशासन मन्त्रालयले स्थानीय तहमा निमित्त प्रमुख प्रशासकीय अधिकृत रहने व्यवस्थाको अन्त्य गरेको छ । यसअगाडि निमित्त प्रमुख प्रशासकीय अधिकृत रहँदा सेवा प्रवाह र विकासनिर्माणका काममा अपेक्षाकृत सफलता हासिल हुन नसकेको गुनासो आएपछि मन्त्रालयले एकै पटक १९१ जना उपसचिव र शाखा अधिकृतलाई स्थानीय तहमा शुक्रबार प्रमुख प्रशासकीय अधिकृतको जिम्मेवारी दिएर खटाएसँगै स्थानीय तहमा निमित्त प्रमुख प्रशासकीय अधिकृत रहने प्रवृत्तिको अन्त्य गरिएको हो ।
यसअगाडि २१० वटा स्थानीय तह निमित्त प्रमुख प्रशासकीय अधिकृतका भरमा सञ्चालन हुँदै आएका थिए । गत असार ३१ गते भगवती न्यौपाने सङ्घीय मामिला तथा सामान्य प्रशासनमन्त्रीमा नियुक्त भएसँगै निमित्त प्रमुख प्रशासीय अधिकृतको अन्त्य गर्ने उद्घोष गर्दै आउनुभएको थियो । मन्त्री न्यौपानेले स्थानीय तह निर्माण भएदेखि नै एक सयदेखि दुई सय स्थानीय तहमा निमित्त प्रमुख प्रशासकीय अधिकृत रहँदै आएकोमा आफू मन्त्री भएसँगै निमित्त प्रमुख प्रशासकीय अधिकृतको अन्त्य गर्दै पूर्ण जिम्मेवारीसहितको प्रमुख प्रशासकीय अधिकृत पठाइएको दाबी गर्नुभयो । मन्त्रालयले यसअगाडि अहिलेसम्म स्थानीय तहमा नगएका कतिपय शाखा अधिकृत र उपसचिवलाई प्रमुख प्रशासकीय अधिकृतको जिम्मेवारीसहित स्थानीय तहमा पठाएको थियो ।
मन्त्रालयका प्रवक्ता कालीप्रसाद पराजुलीले स्थानीय तहमा नगएका तीन सय जना कर्मचारीको सूची तयार गरेको र ती तीन सय कर्मचारीमध्ये प्राथमिकताका क्रममा स्थानीय तहमा खटाइएको बताउनुभयो । मन्त्रालयका अनुसार १२२ जना उपसचिवमध्ये १०५ जनालाई नगरपालिकामा र ९७ जना शाखा अधिकृतमध्ये ८६ जनालाई गाउँपालिकामा खटाएर स्थानीय तहमा निमित्त प्रमुख प्रशासकीय अधिकृतको अन्त्य गरिएको हो । स्थानीय सरकार सञ्चालन ऐनमा महानगरपालिका र उपमहानगरपालिकामा सहसचिव प्रमुख प्रशासकीय अधिकृत, नगरपालिकामा उपसचिव र गाउँपालिकामा शाखा अधिकृत प्रमुख प्रशासकीय अधिकृत हुने व्यवस्था छ । त्यस्तै छ वटा महानगरपालिकामध्ये वीरगन्ज महानगरपालिकामा मात्र प्रमुख प्रशासकीय अधिकृत पठाउन बाँकी छ । त्यस्तै ११ वटा उपमहानगरपालिकामध्ये सुनसरीको इटहरी, धरान उपमहानगरपालिका, धनुषाको जनकपुरधाम, बाराको कलैया, बाँकेको नेपालगन्ज, दाङको घोराही, तुलसीपुर, रुपन्देहीको बुटवल उपमहानगरपालिका र कैलालीको धनगढी उपमहानगरपालिकामा प्रमुख प्रशासकीय अधिकृत रिक्त छन् । मकवानपुरको हेटौँडा र बाराको जितपुरसिमरा उपमहानगरपालिकामा मात्र पूर्ण जिम्मेवारी सहितको सहसचिवको सरुवा मन्त्रालयको सिफारिसमा मन्त्रीपरिषद्ले गर्ने भएकाले अब प्रमुख प्रशासकीय अधिकृत खटाउन बाँकी स्थानीय तहमा मन्त्रीपरिषद्ले निर्णय गर्ने छ ।
