स्मिता अर्जेल
मकवानपुरगढी, चैत २० गते । बागमती प्रदेशसभा सचिवालयको सचिवमा रामकुमार पौडेल नियुक्त हुनुभएको छ । बुधबार नियुक्त हुनुभएका सचिव पौडेललाई सभाका सभामुख भुवनकुमार पाठकले पद तथा गोपनीयताको सपथग्रहण गराउनुभयो ।
सभामुख पाठकको सिफारिसमा प्रदेश प्रमुख दिपकप्रसाद देवकोटाले नेपालको संविधानको धारा १९५ को उपधारा (१) अनुसार उहाँलाई नियुक्त गर्नुभएको हो ।
यसअघिका पूर्वसचिव कृष्णहरि खड्काको कार्यअवधि समाप्त भएपछि पौडेललाई सचिवमा नियुक्त गरिएको हो । यसअघि प्रतिनिधिसभा सचिवालयमा सहसचिव पदमा जिम्मेवारीमा रहनुभएका पौडेलले सचिवमा नियुक्त हुन गत चैत १७ गते पदबाट राजिनामा दिनुभएको थियो ।
पूर्व उपसचिवको जिम्मेवारीमा रहनुभएका पौडेलले बागमती प्रदेश सरकारमा पाँच वर्षीय कार्यकालको जिम्मेवारी सम्हाल्नु हुनेछ ।
