हुम्ला समाचारदाता
हुम्ला, चैत ११ गते । जनताको जीउधनको सुरक्षाका लागि रातदिन खट्ने प्रहरीका लागि स्थापना भएको प्रहरी चौकी आफैँ जोखिममा रहेको छ । हुम्लाको ताँजाकोट गाउँपालिका–२ को मैलाकबाडी प्रहरी चौकीका लागि उपयुक्त स्थान छनोट नहुँदा बाढीपहिरोको उच्च जोखिम रहेको हो ।
मैलाकबाडी प्रहरी चौकी सबैतिरबाट उच्चजोखिममा रहेको हुम्लाका प्रहरी प्रमुख प्रहरी नायब उपरीक्षक (डिएसपी) शङ्कर पोखरेलले बताउनुभयो । अहिले रहेको चौकी भिरालो जमिनमा छ । उहाँले बाढीपहिरो र सुक्खा पहिरोको जोखिममा पनि सो चौकी रहेको बताउनुभयो । कर्णाली कोरिडोरको सडक पनि चौकीमाथिबाट गएकाले सडक दुर्घटनाका हिसाबले पनि थप जोखिममा रहेको उहाँको भनाइ छ । इन्चार्ज प्रहरी सहायक निरीक्षक गोपाल वलीको नेतृत्वमा १० जना प्रहरी छन् । उहाँले विशेष गरी बर्खायाममा पानी परेको समयमा चौकीमा थप जोखिम मोल्नु परेको बताउनुभयो । पानी पर्दा रातभर जाग्राम बस्नुपर्ने अवस्था छ । सो स्थान भिरालो हुँदा सिधै भल बगेर चौकीमा आउने गरेको बताउँदै उहाँले त्यस्तो बेला पालो कुरेर बस्ने गरेको जानकारी दिनुभयो ।
