रजनी योगी
सुर्खेत, चैत १० गते । दैलेखको राकम आधारभूत अस्पताल अब कर्णाली स्वास्थ्य विज्ञान प्रतिष्ठानले सञ्चालन गर्ने भएको छ । सरकारले दैलेखको राकम कर्णालीमा निर्माणको अन्तिम चरणमा पुगेको आधारभूत अस्पताललाई कर्णाली स्वास्थ्य विज्ञान प्रतिष्ठानमातहत सञ्चालन गर्ने निर्णय गरेको छ । सोही निर्णय अनुरूप प्रतिष्ठानले आफ्नो सेवा सुरु गर्न लागेको हो ।
गत माघ २८ गते बसेको मन्त्रीपरिषद् बैठकले राकमको आधारभूत अस्पताललाई ५० शय्यामा स्तरवृद्धि गरी प्रतिष्ठानले सञ्चालन गर्ने निर्णय गरेको थियो । प्रतिष्ठानका उपकुलपति डा. मङ्गल रावलले मन्त्रीपरिषद् बैठकले दैलेख जिल्लाको आठबिस नगरपालिका–४, राकमस्थित आधारभूत अस्पतालको सम्पूर्ण व्यवस्थापन र सञ्चालनको जिम्मेवारी कर्णाली स्वास्थ्य विज्ञान प्रतिष्ठानलाई दिएको बताउनुभयो । उहाँले यो निर्णयसँगै त्यहाँबाट स्वास्थ्य सेवा सञ्चालन गर्ने काम प्रतिष्ठानले अगाडि बढाएको जानकारी दिनुभयो । अहिले अस्पताल सञ्चालनका लागि काम भइरहेको छ । जनशक्ति व्यवस्थापनलगायतको काम जारी छ ।
कर्णाली स्वास्थ्य विज्ञान प्रतिष्ठान र आठबिस नगरपालिकाले नागरिकलाई स्तरीय सेवा प्रदान गर्नका लागि १५ शय्याबाट शिक्षण अस्पतालको सेवा सुरु गर्न लागेका हुन् । एक सय शय्याका अन्य संरचना निर्माण नहुँदासम्म १५ शøयाबाट सेवा सुरु गर्ने गरी प्रक्रिया अघि बढाइएको प्रतिष्ठानका उपकुलपति डा. मङ्गल रावलले बताउनुभयो । उहाँका अनुसार प्रतिष्ठानबाट जनशक्ति परिचालन गरेर सेवा दिन लागिएको छ ।
प्रतिष्ठानले सेवा सुरुसँगै शिक्षण अस्पताल निर्माणको प्रक्रियासमेत अघि बढाएको छ । दैलेखको आठबिस नगरपालिकाको केन्द्र राकम कर्णालीमा ट्रमा सेन्टरसहितको शिक्षण अस्पताल निर्माण गर्न लागिएको हो । पाँच वर्षअघि आठबिस नगरपालिका र जुम्लास्थित कर्णाली स्वास्थ्य विज्ञान प्रतिष्ठानबिच भएको सम्झौता अनुसार एक सय शøयाको ट्रमा सेन्टरसहितको शिक्षण अस्पताल स्थापनाको प्रक्रिया अघि बढाइएको थियो तर निर्माणको काम भने अघि बढ्न सकेको थिएन । सरकारले आवश्यक बजेट विनियोजन नगर्दा अस्पताल निर्माणको काम अघि नबढेको हो । अहिले बजेटको व्यवस्थापन गरेर अस्पताल निर्माणको काम सुरु गर्न लागिएको छ ।
चालु आर्थिक वर्ष २०८१/८२ मा सङ्घीय सरकारले अस्पताल निर्माणका लागि बजेट विनियोजन गरेसँगै अस्पताल निर्माणको काम अघि बढाउन लागिएको हो । सरकारले चालु आवमा अस्पताल निर्माणका लागि दुई करोड बजेट विनियोजन गरेको छ । यो वर्षदेखि अस्पताल निर्माणको काम सुरु गरिने कर्णाली स्वास्थ्य विज्ञान प्रतिष्ठानले जनाएको छ ।
सरकारसँग थप बजेट माग गरेर अस्पताल निर्माणको काम सुरु गर्न लागिएको प्रतिष्ठानका उपकुलपति डा. मङ्गल रावलले बताउनुभयो । उहाँका अनुसार केही महिनाअघि मात्र नयाँ डिपिआर निर्माण गरिएको छ । डिपिआर अनुसार एक अर्ब ७२ करोड रुपियाँ लागत अनुमान रहेको छ । सङ्घीय सरकारको नीति तथा कार्यक्रममा समेटिएको अस्पताल निर्माणको योजना यो वर्षदेखि कार्यान्वयनमा जान लागेको हो । डिपिआर संशोधन गरेर तयार पारिएकाले लागत अनुमान पनि बढेको छ । यसअघि बनेको डिपिआर अस्पतालको भवन निर्माणका लागि मात्र तयार पारिएको थियो । उक्त डिपिआरमा भवन निर्माणका लागि ९० करोडको लागत अनुमान छ । नयाँ निर्माण गरिएको डिपिआरमा अस्पतालका लागि निर्माण गरिने सम्पूर्ण संरचनाको लागत अनुमान तयार पारिएको छ ।
