गोरखापत्र समाचारदाता
काठमाडौँ, फागुन १ गते । राष्ट्रिय युवामैत्री लोकदोहोरी प्रतियोगितामा तारा थापा र सुमन खड्काको कर्णाली टिम पहिलो भएको छ । राष्ट्रिय युवा परिषद् र परिषद्मा आबद्ध कला, साहित्य युवा सञ्जालले संयुक्त रूपमा गरेको प्रतियोगितामा तारा र सुमनको समूह विजेता बनेको हो । विजेताले एक लाख रुपियाँ पुरस्कार प्राप्त गरे । काठमाडौँमा दुई दिनसम्म भएको प्रतियोगितामा पृतम पोखरेल र सविता परियार रहेको जनकपुर टिम दोस्रो भयो । यस्तै घनश्याम परियार र जमुना विश्वकर्माको नारायणी टिम तथा प्रकाश दुरा र आशा केसीको राप्ती टिम तेस्रो भएका छन् । उनीहरूलाई युवा तथा खेलकुदमन्त्री तेजुलाल चौधरीले पुरस्कार प्रदान गर्नुभयो ।
