इरानी नोबेल विजेता मोहम्मदीको अस्थायी रिहाइ ‘अपर्याप्त’ : समर्थकहरू

पेरिस, मङ्सिर १९ गते । इरानी नोबेल शान्ति पुरस्कार विजेता नर्गिस मोहम्मदीको चिकित्सा आधारमा तेहरानको जेलबाट तीन हप्ताका लागि अस्थायी रिहाइ अपर्याप्त रहेको उहाँको परिवार र समर्थकहरूले बताएका छन् । उनीहरूले मोहम्मदीको असीमित स्वतन्त्रताको माग गरेका छन् ।

“नर्गिस मोहम्मदीको सजायको २१ दिनको निलम्बन अपर्याप्त छ, हामी उहाँको तत्काल र बिना सर्त रिहाइ वा कम्तीमा तीन महिनासम्म छुटको विस्तार माग गर्छौँ”, सरकारको उक्त कदमलाई ‘अत्यन्त कम र बढी ढिलो’ भन्दै उनीहरूले एक विज्ञप्तिमा भने । मोहम्मदी वकिल मुस्तफा निलीले यसअघि एक्समा उहाँको जेल सजाय तीन हप्ताका लागि ‘निलम्बित’ गरिएको र उहाँ रिहा भएको घोषणा गर्नुभएको थियो ।

तर उहाँका समर्थकहरूले यो रिहाइ चिकित्सकीय बिदा नभई र केवल एक स्थगन मात्र हो भनेका छन् । यसको अर्थ तेहरानको एभिन कारागारमा फर्किएपछि उहाँले ‘थप २१ दिन’ भोग्नुपर्नेछ । इरानमा मानव अधिकारका लागि अभियान चलाउँदा सन् २०२३ को नोबेल शान्ति पुरस्कार जित्नुभएकी मोहम्मदीले गत महिना गैर-घातक वृद्धिका लागि हड्डीको ग्राफ्टसहित हड्डीको शल्यक्रिया गराउनुभएको थियो ।

“शल्यक्रियापछि उचित चिकित्सकीय हेरचाह र पर्याप्त सुधारको समय अस्वीकार गरिएका कारण ‘बेडसोर’ को द्रुत विकास र उहाँको पिठ्युँ र खुट्टामा दुखाइ बढेको छ”, समर्थक र परिवारले भनेका छन्, “एक दशकभन्दा बढी जेल परेपछि नर्गिसलाई सुरक्षित, स्वच्छ वातावरणमा विशेष चिकित्सा सेवा चाहिन्छ, यो आधारभूत मानव अधिकार हो ।” 

मोहम्मदीलाई नोभेम्बर २०२१ देखि महिलाहरूका लागि अनिवार्य हिजाब र इरानमा मृत्युदण्डको विरोधमा केही पूर्व अभियोगहरूमा कैद गरिएको छ । उनले आफ्नो पेरिसमा बस्ने पति र जुम्ल्याहा बच्चाहरूलाई धेरै वर्षदेखि देख्नुभएको छैन र पछिल्लो दशकको धेरै समय जेलभित्र र बाहिर बिताउनुभएको छ ।

कारागार भित्र र फ्रान्समा आफ्नो परिवारसँग बोल्ने अधिकारबाट वञ्चित उहाँले अभियान जारी राख्न अस्वीकार गर्नुभयो, एभिन कारागारको आँगनमा प्रदर्शन गर्नुभयो र भोकहड्ताल गर्नुभयो । रासस/एएफपी