फडिन्द्र अधिकारी
लेखनाथ, मङ्सिर ३ गते । रसियन कम्युनिस्ट पार्टीका अध्यक्ष सर्गेई मालिन्कोविच पोखरा आईपुग्नु भएको छ । नेपाल कम्युनिस्ट पार्टी (एकीकृत समाजवादी) को निमन्त्रणामा नेपाल आउनुभएका उहाँसहित तीन सदस्यीय टोली पोखरा आइपुगेको हो ।
पोखरा अन्तर्राष्ट्रिय विमानस्थलमा उहाँहरूलाई नेकपा (एकीकृत समाजवादी) का सचिव श्रीनाथ बराल, नेता तुलबहादुर गुरुङ लगायतले स्वागत गर्नुभयो । तीन दिन पोखरा बस्ने टोलीले गण्डकी प्रदेशका कम्युनिष्ट नेता, कार्यकर्तासँग भेटघाट गर्ने नेपाल कम्युनिस्ट पार्टी (एकीकृत समाजवादी) कास्की उपाध्यक्ष पूर्ण लामाले जानकारी दिनुभयो ।
“विभिन्न कम्युनिस्ट पार्टीका नेताहरूसँग भेटघाट, अन्तरक्रिया र अनुभव साटासाट गर्ने कार्यक्रम छ” लामाले भन्नुभयो, “यहाँहरू पर्यटन राजधानी पोखराका पर्यटकीय स्थानहरू फेवाताल, शान्तिस्तूप, पुम्दीकोट, सराङकोट लगायतका स्थान भ्रमणका लागि समेत जानुहुनेछ ।” पोखरा आइपुगेको टोली मङ्गलबर फर्किने तय छ ।
