सन्तोष राउत
सोलुखुम्बु, पुस ६ गते। सोलुखुम्बुको सोलुदुधकुण्ड नगरपालिका–१० टाप्टिङको नयाँ प्रशासनिक भवन तयार भएपछि आफ्नै भवनबाट सेवा दिन थालिएको छ। विगत ९ वर्षदेखि भाडाको घरबाट सेवा प्रदान गर्दै आएकोमा भवन बनेपछि सेवा सुरु भएको हो।
जिल्ला समन्वय समितिका प्रमुख कृष्णप्रसाद निरौलाले प्रशासनिक भवनको उद्घाटन गर्दै जिल्लाका स्थानीय तहहरूको भौतिक पूर्वाधार विकासमा आफू सकारात्मक रहेको बताउनुभयो।
त्यस अवसरमा सोलुदुधकुण्ड नगरपालिकाका मेयर नाम्गेल जाङबु शेर्पाले नयाँ भवन सञ्चालनमा आएसँगै वडा कार्यालयबाट नागरिकलाई थप व्यवस्थित र प्रभावकारी सेवा प्रवाह हुने विश्वास व्यक्त गर्नुभयो।
ग्रीनतारा कन्स्ट्रक्सन कम्पनी प्रा.लि.द्वारा निर्माण गरिएको उक्त भवन २०८१ साल साउन १९ गते ठेक्का सम्झौता गरी २०८२ साल जेठ ३० गते निर्माण सम्पन्न भएको वडा अध्यक्ष होम बहादुर मगरले जानकारी दिनुभयो। भ्याटसहित एक करोड १४ लाख ३० हजार ७५६ रुपियाँको लागतमा निर्मित भवनका लागि आवश्यक बजेट जिल्ला समन्वय समिति सोलुखुम्बु र सोलुदुधकुण्ड नगरपालिकाबाट विनियोजन गरिएको थियो।
सेवाग्राहीलाई सहज र प्रभावकारी सेवा प्रवाह गर्ने उद्देश्यले निर्माण गरिएको यस भवनबाट वडा सेवा अझ सुदृढ र व्यवस्थित हुने अपेक्षा स्थानीय सेवाग्राहीले गरेका छन्।
-original-thumb.jpg)
-original-thumb.jpg)
