फडिन्द्र अधिकारी
लेखनाथ, वैशाख २२ गते । नेपाली कांग्रेस संसदीय दलले गण्डकी प्रदेश सभामा प्रमुख सचेतकको जिम्मेवारी प्रदेशसभा सदस्य प्रकाश बराललाई दिएको छ ।
संसदीय दलका नेता समेत रहनुभएका मुख्यमन्त्री सुरेन्द्रराज पाण्डेले मङ्गलबार बराललाई प्रमुख सचेतकको जिम्मेवारी दिनुभएको हो ।
यसअघि प्रमुख सचेतक रहनुभएका प्रदेशसभा सदस्य नन्दप्रसाद न्यौपाने वैशाख २ गते ऊर्जा, जलस्रोत तथा खानेपानी मन्त्री बनेपछि बराललाई जिम्मेवारी दिइएको छ । बराल यसअघि सचेतक हुनुहुन्थ्यो । गण्डकी प्रदेशसभामा दलका प्रमुख सचेतकलाई निवास र गाडी सुविधा प्राप्त हुन्छ ।
उहाँ कास्कीबाट निर्वाचित प्रदेशसभा सदस्य हुनुहुन्छ । बराल प्रमुख सचेतक बनेसँगै सचेतक पद रिक्त भएको छ । यता, सत्ता गठबन्धनमा रहेको नेकपा (एमाले) का प्रमुख सचेतक गोविन्दबहादुर नेपाली पनि भौतिक पूर्वाधारमन्त्री नियुक्त भएपछि एमालेमा पनि प्रमुख सचेतक रिक्त छ । एमाले संसदीय दलको सचेतकमा प्रदेशसभा सदस्य देवका पहारी हुनुहुन्छ ।
-original-thumb.jpg)
