दिपकप्रसाद गौतम
वीरगञ्ज, भदौ २५ गते। पर्साको वीरगञ्जमा रहेको नारायणी अस्पतालमा विस्तार गरिएको क्यान्सर उपचार सेवाको स्वास्थ्य मन्त्री प्रदीप पौडेलले मंगलबार एक कार्यक्रमका बिच उदघाट्न गर्नुभएको छ।
नारायणी अस्पतालमा क्यान्सर उपचार सेवाका लागि हाल ६ शैय्याको अंकोलोजी वार्ड सञ्चालनमा ल्याइएको छ। भक्तपुर क्यान्सर अस्पतालका कार्यकारी निर्देशक डा. उज्ज्वल चालिसेका अनुसार नारायणी अस्पतालमा क्यान्सर रोगका प्राय सबै उपचार सेवा सुरु गरिएको छ। उहाँका अनुसार नारायणी अस्पतालमा क्यान्सर रोगको स्क्रिीनिंग, डाइग्नोसीस्, केमोथेरापी, पालिटिएभ केयर, रेफरेल, काउन्सिलिंग लगायतका सेवा सुरु गरिएको हो।
नारायणी अस्पतालमा सुरु गरिएको क्यान्सर उपचार सेवामा हालका लागि भक्तपुर क्यान्सर अस्पतालका मेडिकल अंकोलोजिष्ट सहित दुई जना चिकित्सक खटिनु भएको नारायणी अस्पतालका मेडिकल सुपरिटेन्डेन्ट डाक्टर एनामुल हकले जानकारी दिनुभयो।
स्वास्थ्यमन्त्री पौडेलले उक्त क्यान्सर उपचार सेवा विस्तार उदघाट्न समारोहलाई सम्बोधन गर्दै देशका सातवटै प्रदेशमा क्यान्सर रोगको उपचार सेवा विस्तार गर्ने क्रममा नारायणी अस्पतालमा पनि मंगलबारदेखि उपचार सुरु गरिएको जानकारी दिनुभयो।
सरकारले सातै प्रदेशमा क्यान्सर उपचार सेवा विस्तार गर्ने घोषणा गरे अनुसार कोशी अस्पताल विराटनगर र मधेश प्रदेशको नारायणी अस्पतालमा भक्तपुर क्यान्सर अस्पतालको प्रत्यक्ष निगरानीमा तालिम दिने र नियमित रुपमा सञ्चालन गर्ने गरी क्यान्सर उपचार सेवालाई सुरु गरिएको उहाँले बताउनुभयो।
मुलुकभरका सबै स्वास्थ्य संस्थामा जनशक्ति अभाव रहेको र स्वास्थ्य मन्त्रालयको जनशक्ति थप्ने इच्छा भएतापनि देशको आर्थिक अवस्थाको कारणले अहिले जति जनशक्ति छ, जस्तो पूर्वाधार छ त्यसबाटै नै सेवा दिनुपर्ने बाध्यता रहेको उहाँले बताउनुभयो।
अस्पताल विकास समितिका अध्यक्ष धिरज गुप्ताको अध्यक्षतामा भएको उद्घाटन समारोहमा प्रदेशसभा सदस्य श्याम पटेल, स्वास्थ्य मन्त्रालयका गुणस्तर तथा मापन शाखा प्रमुख डा. मदनकुमार उपाध्याय, वीरगञ्ज उपमहानगरपालिकाका उपप्रमुख इम्तियाज आलम लगायतको उपस्थिति रहेको थियो।
