साथी !
ए साथी !
गज्जब भएछ साथी ।
साथीले समाचार सुनेको हुनुपर्छ ।
समुद्रमा प्वाल पर्ने भयो ।
आकाश टुक्रिने भयो ।
पहाडहरू दगुर्ने भए ।
सर्पहरूले रतेउली खेल्ने भए ।
घडियालले सुत्केरी स्याहार्ने भयो ।
गोरुले दुध दिने भयो ।
गाईले बारी जोत्ने भयो ।
स्यालहरूका सिङ पलाएछन् ।
गधा चढेर जेठोबा तीर्थ गएछन् ।
भाइ मारेर जेठी छोरीले अंश मुद्दा हालिछिन् ।
छोरोले बाउ काटेछन् ।
बुहारीले सासू काटिछिन् ।
भाइले दाइ काट्न त
कुन ठुलो कुरा हो र साथी ?
जस्तो कि,
काबिलले हाबिल काटेका थिए ।
अझै अचम्मको कुरा के भने नि साथी ?
काटेर गाई पुजारीले गधा पुजेछन् ।
साथी !
ए साथी !
गज्जब भएछ साथी ।
साथीले समाचार सुनेको हुनुपर्छ ।
