.jpg)
विनय कर्ण
कल्याणपुर (सप्तरी), वैशाख २६ गते । सप्तरी प्रहरीले विभिन्न मुद्दामा अदालतबाट सजाय तोकिएर फरार रहेका नौ जना प्रतिवादीलाई पक्राउ गरी अदालतमा बुझाएको छ ।
जिल्ला प्रहरी कार्यालय सप्तरीबाट खटिएको प्रहरी टोलीले फैसला कार्यान्वयनको सिलसिलामा विभिन्न मुद्दामा दोषी ठहर भई फरार रहेका प्रतिवादीहरूको खोजतलास गरी पक्राउ गरेको हो ।
पक्राउ पर्नेहरूमा डाक्नेश्वरी नगरपालिका–३ का सबदलाल मुखिया, शम्भु कुमार मुखिया र सन्तोषी देवी मुखिया रहेका छन् । उनीहरूलाई कुटपिट मुद्दामा जनही पाँच सय रुपैयाँ जरिवाना तथा पाँच सय रुपैयाँ क्षतिपूर्ति तोकिएको थियो ।
त्यसैगरी साविक कबिलासा गाविस–९ (हाल डाक्नेश्वरी नगरपालिका–१) का भुपेन्द्र साह र विनोद साहलाई लुटपाट तथा कुटपिट मुद्दामा जनही एक सय १० रुपैयाँ जरिवाना तोकिएको थियो ।
यस्तै शम्भुनाथ नगरपालिका–१२ का दिनेशप्रसाद साहलाई मोबाइल चोरी मुद्दामा दुई सय रुपियाँ जरिवाना, राजविराज नगरपालिका–१ का महेशप्रसाद यादवलाई लागुऔषध मुद्दामा दुई दिन कैद सजाय तोकिएको छ ।
सोही स्थानका सनोज यादवलाई आपराधिक उपद्रव मुद्दामा दुई हजार रुपियाँ जरिवाना तथा एक महिना कैद र राजविराज नगरपालिका–११ का अमितकुमार यादवलाई पनि आपराधिक उपद्रव मुद्दामा दुई हजार रुपियाँ जरिवाना र एक महिना कैद सजाय तोकिएको जिल्ला प्रहरी कार्यालय सप्तरीका प्रहरी नायब उपरीक्षक डम्बरबहादुर पुरीले जानकारी दिनुभयो । पक्राउ परेकाहरूलाई आवश्यक कारबाहीका लागि अदालतमा बुझाइएको प्रहरीले जनाएको छ ।
-square-thumb.jpg)
-original-thumb.jpg)
