गणतन्त्रलाई कमजोर पार्ने दुस्साहसप्रति सचेत हुनुपर्छ: लुम्बिनी प्रदेश प्रमुख शेरचन

पविता पौडेल 

सैनामैना, फाल्गुन ३ गते । लुम्बिनीका प्रदेश प्रमुख अमिक शेरचनले नेपालको सङ्घीय लोकतान्त्रिक गणतन्त्रलाई कमजोर पार्ने दुस्साहस भइरहेको भन्दै त्यसतर्फ सबै सचेत हुनुपर्नेमा जोड दिनुभएको  छ ।

लुम्बिनी प्रदेश स्थापना भएको उपलक्ष्यमा जारी गरिएको प्रेस विज्ञप्तिमा प्रदेश प्रमुख अमिक शेरचनले नेपाली जनताको लामो बलिदानीबाट आफ्नै मौलिकतामा आधारित समावेशी, समानुपातिक, धर्म निरपेक्षता, सङ्घ, प्रदेश र स्थानीय तीन तहको सरकारको संरचनासहित सङ्घीय गणतन्त्र प्राप्त भएको भन्दै प्राप्त उपलब्धिको रक्षाका लागि सबै सचेत हुनुपर्नेमा जोड दिनुभयो ।

यसलाई सङ्कटमा वा कमजोर पार्ने दुस्साहस भइरहेको भन्दै उहाँले संविधानले असंलग्न, स्वाधीन, समुन्नत समाजवाद उन्मुख राष्ट्रको परिकल्पना गरेको सङ्घीय लोकतान्त्रिक गणतन्त्रमाथि आँच आउन नदिन सबै सचेत हुनुपर्ने आवश्यकता औँल्याउनुभएको छ ।

परनिर्भर आयातित अर्थतन्त्रबाट राष्ट्रको आत्म स्वाभिमानलाई कमजोर पार्ने र परनिर्भरतामा बच्नुपर्ने स्थितिबाट राष्ट्रलाई जोगाउन राष्ट्रिय पुँजीको समुचित परिचालन अतिआवश्यक भएको प्रदेश प्रमुख शेरचनको भनाइ छ ।