सफाइक्षेत्रमा कार्यरत कर्मचारी सामाजिक सुरक्षा कोषमा आबद्ध

अनिल पराजुली
हेटौँडा, भदौ १३ गते । हेटौँडा उपमहानगरपालिका क्षेत्रमा फोहोर सङ्कलन र व्यवस्थापनमा खटिने सफाइ कर्मचारीहरुलाई पहिलोपटक योगदानमा आधारित सामाजिक सुरक्षा कोषमा आबद्ध गराइएको छ । हेटौँडा उपमहानगर पालिकासँगको साझेदारीमा ग्रीन एण्ड क्लिन सिटी सर्भिस प्रालिले ५३ जना कर्मचारीलाई साउनदेखि सामाजिक सुरक्षा कोषमा आबद्ध गराएको हो ।

हेटौँडाको फोहोर व्यवस्थापनलाई अझ व्यवस्थित बनाउन हेटौँडा–१ स्थित भैरवडाँडामा २१ कठ्ठा जग्गा भाडामा लिएर कम्पोष्ट प्लान्ट सञ्चालनको तयारी गरिनुका साथै हेटौँडा–१ चौकीटोलमा वेस्ट डेमो सेन्टर निर्माण गर्न ५ कठ्ठा जमिन भाडामा लिइएको ग्रीन एण्ड क्लिन सिटी सर्भिस प्रालिका अध्यक्ष नवराज खतिवडाले जानकारी दिनुभयो । प्रालिले २०६२ सालदेखि नै उपमहानगरपालिकासँगको साझेदारीमा काम गर्दै आएको छ ।

हेटौँडा उपमहानगर नगरप्रमुख मीनाकुमारी लामाको प्रमुख आतिथ्यमा बिहीबार आयोजित कार्यक्रममा सफाईक्षेत्रमा कार्यरत कर्मचारीलाई कोषमा समावेश गरिएको थियो । कार्यक्रममा नगरप्रमुख लामाले फोहोरमैला सङ्कलन गर्ने काम कठिन र जोखिमपूर्ण हुने भएकाले कर्मचारीको सामाजिक सुरक्षा सुनिश्चित गर्नु उपमहानगरको दायित्व भएको बताउनुभयो । उहाँले स्वास्थ्य संवेदनशीलतालाई ध्यान दिदै सुरक्षाका उपाय अपनाएर मात्रै कार्यमा खटिन सफाई कर्मचारीलाई सुझाव दिनुभयो ।

फोहोरमैला व्यवस्थापन सङ्घका सल्लाहकार प्राध्यापक डा. आशिष खनालले सफाइक्षेत्रमा कार्यरत कर्मचारीलाई शतप्रतिशत सामाजिक सुरक्षा कोषमा आवद्ध गरिएको पहिलोपटक भएको दाबी गर्नुभयो । उहाँले देशभर करिब ७० भन्दा बढी संस्था यसक्षेत्रमा सक्रिय भए पनि सम्पूर्ण कर्मचारीलाई एकैपटक कोषमा आबद्ध गराइएको यो पहिलो भएको बताउनुभयो ।

प्रालिका अध्यक्ष खतिवडाले सामाजिक सुरक्षा कोषमा आबद्धताले कर्मचारीको जीवनस्तर उकास्न महत्त्वपूर्ण योगदान गर्ने विश्वास व्यक्त गर्नुभयो । उहाँले स्वास्थ्य र सुरक्षालाई प्राथमिकता दिएर आगामी दिनमा निःशुल्क स्वास्थ्य बीमा गर्ने तयारी भइरहेको जानकारी दिनुभयो ।

२०७२ सालमा हेटौँडालाई नेपालकै पहिलो स्वच्छ सहर घोषणा गराउन महत्वपूर्ण भूमिका निर्वाह गरेको थियो । हाल १३ वटा सवारी साधनमार्फत फोहोर सङ्कलन गर्दै आएको कम्पनीले स्रोतमै वर्गीकरणको अभ्यासलाई निरन्तरता दिइरहेको छ । फोहोरमैलालाई स्रोतमै वर्गीकरण गरी रङ र बारमा आधारित फोहोर सङ्कलन कार्य भइरहेको छ । फोहोर सङ्कलन भएपछि पहिलो चरणका एकीकृत फोहर व्यवस्थापन केन्द्रमा ल्याई फोहोरको वर्गीकरण गरेर छुट्याउने गरिएको छ । फोहोर व्यवस्थापनका लागि संस्थाले करिव तीन करोड लगानी गरेको छ भने २० हजार घरधुरीले सेवा लिइरहेका छन् । दैनिक हेटौँडाबाट २६ टन फोहर सङ्कलन  हुँदै आएको छ ।