रौतहटको छ वटा नगरपालिकामा पुनः मतदान सुरु
रौतहटको ६ वटा नगरपालिकामा बुधबार मतदान सुरु भएको छ । वैशाख ३० गतेको निर्वाचनमा उत्पन्न विवाद, मतपेटिकामा आगजनी तथा लुटपाटको घटनाले स्थगन भएको निर्वाचन आज पुनः सुरु भएको हो ।
जनकपुरधाममा स्वतन्त्र उम्मेदवारको अग्रता बढ्दै
मधेस प्रदेशको राजधानीसमेत रहेको जनकपुरधाम उपमहानगरपालिकामा स्वतन्त्र उम्मेदवारले आफ्नो अग्रतालाई फराकिलो बनाउँदै लगेका छन् । त्यहाँ पाँचदलीय गठबन्धनका तर्फबाट नगरप्रमुखका साझा उम्मेदवार पाँचौँ स्थानमा छन् । गठबन्धनका तर्फबाट नगरप्रमुखका साझा उम्मेदवार जनता समाजवादी पार्टीका लालकिशोर साहको मत परिणाम निराशाजनक देखिएको हो । नगरप्रमुखमा स्वतन्त्र उम्मेदवार मनोज साहले तीन हजार ९५६ मतका साथ अग्रता बनाउँदा निवर्तमान नगरप्रमुखसमेत रहनुभएका गठबन्धनका उम्मेदवार लालकिशोर ४२९ मत ल्याएर पाँचौँ स्थानमा हुनुहुन्छ ।
चौबीस मतदान केन्द्रमा आज मतदान
रौतहटको २४ वटा मतदान केन्द्रमा जेठ ४ गते बुधबार पुनः निर्वाचन हुनेभएको छ । स्थानीय तह चुनावअन्तर्गत वैशाख ३० गते रद्दभएको जिल्लाको छवटा पालिकाका १० वटा मतदान स्थलको २४ वटा मतदान केन्द्रमा पुनः मतदान गराउन निर्वाचन आयोगको आदेशानुसार जेठ ४ गते बुधबार निर्वाचन हुने जिल्ला निर्वाचन कार्यालय रौतहटका प्रमुख छोटेलाल दासले बताउनुभयो ।
पालिकाको अन्तिम परिणाम आउने क्रम जारी
मधेस प्रदेशअन्तर्गत जिल्लाका स्थानीय तहको अन्तिम मत परिणाम आउन थालेको छ । अहिलेसम्ममा एक नगरपालिका र चार गाउँपालिकाको मत परिणाम सार्वजनिकभएको निर्वाचन कार्यालयले जनाएको छ । प्रदेशका सप्तरी, धनुषा, सर्लाही, सिरहाका केही स्थानीय तहका प्रमुख÷अध्यक्ष र उपप्रमुख÷उपाध्यक्षका अन्तिम परिणाम घोषणाभएको छ ।
रौतहटको २४ मतदान केन्द्रमा बुधबार पुनः मतदान हुने
सञ्जय कुमार मिश्रगौर, जेठ ३ गते । स्थानिय तह निर्वाचन अन्तर्गत वैशाख ३० गते स्थगित भएको रौतहट जिल्लाको २४ वटा मतदान केन्द्रमा जेठ ४ गते बुधवार पुनः निर्वाचन हुनेभएको छ । रौतहटको ६ वटा पालिकाकोे १० वटा मतदान स्थलको २४ वटा मतदान केन्द्रमा मतदान गराउन निर्वाचन आयोगले आदेश दिइएअनुसार जेठ ४ गते बुधवार निर्वाचन हुने जिल्ला निर्वाचन कार्यालय रौतहटका प्रमुख छोटेलाल दासले बताउनुभयो ।फतुआविजयपुर नपाको स्वास्थ्यचौकी मतदान स्थलको २ वटा मतदान केन्द्र, देवाहीगोनाही नपाको जनप्रिय प्रावि मतदान स्थलको २ मतदान केन्द्र, यमुनामाई गाउँपालिकाको श्री मावि भेडियाहीको मतदान स्थलको २ वटा, श्रीमावि चिकना जेठरहिया मतदान स्थलको ३ मतदान केन्द्रमा मतदान हुँदैछ ।यसैगरी, गढीमाई नपाको आदर्श प्रावि मतदान स्थलको २ मतदान केन्द्र, प्रावि लक्ष्मीपुर मतदान स्थलको २ मतदान केन्द्र, बौद्धीमाई नपाको कंकाली मतदान स्थलको २ मतदान केन्द्र, अजगैवी मतदान स्थलको ३ मतदान केन्द्र, इनरवा प्रावि मतदान स्थलको ३ मतदान केन्द्र र गरुडा नपाको शिवशंकर प्रावि मतदान स्थलको १ वटा मतदान केन्द्र गरी २४ वटा मतदान केन्द्रमा निर्वाचन हुँदैछ ।
धनुषाको १८ मध्ये पाँच पालिकाको मतपरिणाम सार्वजनिक
धर्बेन्द्र झा जनकपुरधाम, जेठ ३ गते । स्थानीय तह निर्वाचन अन्तर्गत धनुषाको १८ वटा पालिकामध्ये मंगलबार दिउँसो सम्ममा चार वटा पालिकाको मत परिणाम सार्वजनिक भएको छ । मतपरिणाम सार्वजनिक भएको पाँच पालिकामध्ये दुईमा नेपाली काँग्रेस, दुईमा नेकपा (एमाले) र एक पालिकामा जनता समाजवादी पार्टीले जित हाँसिल गर्न सफल भएको छ । धनुषाको लक्ष्मिनियाँ गाउँपालिकाको अध्यक्षमा नेपाली काँग्रेसका भोगेन्द्र मिश्रले तीन हजार ७६५ मत ल्याएर निर्वाचित हुनुभएको छ । आफनो निकटतम प्रतिद्धन्दीभन्दा २६८ मत बढी ल्याएर उहाँ निर्वाचित हुनुभएको हो । उहाँका निकटतम प्रतिद्धन्दी जनता समाजवादी पार्टीका शत्रुधन यादवले तीन हजार ४९७ मत प्राप्त गर्नुभएको छ । त्यसैगरी, उपाध्यक्षमा काँग्रेसकै फुलकुमारी यादव तीन हजार ६२८ मत प्राप्त गरी निर्वाचित हुनुभएको छ । उहाँको निकटतम प्रतिद्धन्दी जनता समाजवादी पार्टीका विमलाकुमारी यादवले तीन हजार ४६० मत प्राप्त गर्नुभएको छ ।धनुषाकै धनौजी गाँउपालिकाको अध्यक्षमा नेपाली काँग्रेसका राजकुमार साह दुई हजार २६२ मत प्राप्त गरी निर्वाचित हुनुभएको छ । उहाँका निकटतम प्रतिद्धन्दी लोकतान्त्रिक समाजवादी पार्टीका जीवेन्द्र झाले दुई हजार १६३ मत प्राप्त गर्नुभएको छ । त्यसैगरी उपाध्यक्षमा काँग्रेसकै रामवती देवीले दुई हजार ४३० मत प्राप्त गरी निर्वाचित हुनुभएको छ । उहाँको निकटतम प्रतिद्धन्दी लोकतान्त्रिक समाजवादी पार्टीका रंजितादेवी मण्डलले एक हजार ९०१ मत प्राप्त गर्नुभयो । धनुषाको विदेह नगरपालिकाको प्रमुखमा एमालेका बेचन दास चार हजार ४१२ मत प्राप्त गरी निर्वाचित हुनुभएको छ । आफनो प्रतिद्धन्दी नेकपा एकृकित समाजवादीका राजकिशोर रोहिता यादव भन्दा ९८५ मत बढी ल्याएर निर्वाचित हुनुभएको हो । उहाँका निकटतम प्रतिद्धन्दी एकृकित समाजवादीका यादवले तीन हजार ४२७ मत ल्याउनुभएको छ । त्यसैगरी उपप्रमुखमा एमालेकै आशा झा चार हजार ६५९ मत ल्याएर निर्वाचित हुनुभयो । उहाँका निकटतम प्रतिद्धन्दी नेपाली काँग्रेसका सीमादेवी महतोले दुई हजार ७८६ मत प्राप्त गर्नुभयो । धनुषाकै औरही गाँउपालिकाको अध्यक्षमा एमालेका उमाशंकरप्रसाद साहले तीन हजार ३२६ मत प्राप्त गरी निर्वाचित हुनुभएको छ । उहाँ आफनो निकटतम प्रतिद्धन्दी काँग्रेसका उम्मेदवार व्रहमदेव यादवभन्दा ४०३ मत बढी ल्याएर निर्वाचित हुनुभएको हो । उहाँको निकटतम प्रतिद्धवन्दी यादवले दुई हजार ९२३ मत प्राप्त गर्नुभएको छ । त्यसैगरी उपाध्यक्षमा एमालेकै पुनमकुमारी साहले दुई हजार ९९४ मत ल्याएर निर्वाचित हुनुभएको छ । उहाँको निकटतम प्रतिद्धन्दी काँग्रेसका रिंकुकुमारी मण्डलले दुई हजार ७९० मत प्राप्त गर्नुभएको छ । धनुषाको जनकनन्दनी गाँउपालिकाको अध्यक्षमा जनता समाजवादी पार्टीका दिपिनदेव यादव तीन हजार १५७ मत प्राप्त गरी विजयी हुनुभएको छ । उहाँको निकटतम प्रतिद्धन्दी काँग्रेसका सुरेश चौधरीले दुई हजार ७६८ मत प्राप्त गर्नुभएको छ । त्यसैगरी उपाध्यक्षमा काँग्रेसका कमला सहगलले दुई हजार ९९८ मत प्राप्त गरी निर्वाचित हुनुभएको छ । उहाँको निकटतम प्रतिद्धन्दी जनता समाजवादीका गीता सुढीले दुई हजार ८४० मत प्राप्त गर्नुभएको छ । घोषणा भएका बाहेकका पालिकामा मतगणना जारी रहेको र छिटै मतगणना सम्पन्न गर्ने पक्षमा निर्वाचन आयोग रहेको मधेश प्रदेश निर्वाचन कार्यलयका प्रमुख श्रीधर पन्थीले जानकारी दिनुभयो ।
भगवानपुर र विष्णुपुर गाउँपालिकामा एमाले विजयी
सन्तोष सुवेदीसिरहा, जेठ ३ गते । सिरहाको भगवानपुर र विष्णुपुर गाउँपालिकामा नेकपा (एमाले) का उम्मेदवारहरु उग्रनारायण यादव र सत्यनारायण यादव निर्वाचित हुनुभएको छ । उहाँहरुले निवर्तमान गाउँपालिका अध्यक्ष रहनुभएका वेचनप्रसाद यादव र जागेश्वर यादवलाई पराजित गरी निर्वाचित हुनुभएको हो । भगवानपुर गाउँपालिका एमालेका उग्रनारायण यादवले चार हजार ३०२ मत प्राप्त गर्नुभएको थियो भने उहाँको निकटतम प्रतिस्पर्धी जनता समाजवादी पार्टीका वेचनप्रसाद यादवले तीन हजार २३९ मत प्राप्त गर्नुभएको थियो ।भगवानपुर गाउँपालिकाको उपाध्यक्षमा एमालेका रेखाकुमारी यादव तीन हजार ९६० मत प्राप्त गरी निर्वाचित हुनुभएको छ । उहाँका निकटतम प्रतिद्वन्दी जसपाका जिवछीदेवी यादवले तीन हजार २१० मत प्राप्त गर्नुभएको भगवानपुर गाउँपालिकाका निर्वाचन अधिकृत विकासकुमार रजकले जानकारी दिनुभयो । यसैगरी, विष्णुपुर गाउँपालिकाको अध्यक्षमा एमालेका सत्यनारायण यादवले निकटतम प्रतिद्वन्दीलाई ४१ मतले पछि पार्दै निर्वाचित हुनुभएको छ । नवनिर्वाचित गाउँपालिका अध्यक्ष सत्यनारायण यादवले दुई हजार १५८ मत प्राप्त गर्नुभएको छ । उहाँका निकटतम प्रतिद्वन्दी जसपाका जागेश्वर यादवले दुई हजार ११७ मत प्राप्त गर्नुभयो । विष्णुपुर गाउँपालिकाका उपाध्यक्षमा भने जसपाकी गीताकुमारी सिंह निर्वाचित हुनुभएको छ । नवनिर्वाचित सिंहले दुई हजार २७२ मत प्राप्त गर्नुभएको छ । उहाँको निकटतम प्रतिद्वन्दी नेपाली काङ्ग्रेसकी चन्द्रकलाकुमारी यादवले एक हजार १६९ मत प्राप्त गर्नुभयो ।
धनौजी गाउँपालिका अध्यक्ष र उपाध्यक्षमा काँग्रेस निर्वाचित
धनुषाको धनौजी गाउँपालिका अध्यक्षमा नेपाली काँग्रेसका उम्मेदवार राजकुमार साह निर्वाचित हुनुभएको छ । जिल्लाको धनौजी गाउँपालिका अध्यक्षमा २ हजार २ सय ६२ मतले काँग्रेसका उम्मेदवार साह विजयी हुनुभएको हो ।
सर्लाहीको बलरा नगरपालिकामा माओवादी केन्द्र विजयी
सर्लाहीको बलरा नगरपालिकाको प्रमुखमा नेकपा माओवादी केन्द्रका रामाशङ्कर प्रसाद कुशवाहा विजयी हुनुभएको छ । निकटतम प्रतिस्पर्धी लोकतान्त्रिक समाजवादी पार्टी (लोसपा) का अभय कुमार सिंहलाई एक हजार १२ मतले पछि पार्दै कुशवाहा नगरप्रमुखमा निर्वाचित हुनुभएको हो ।
स्थानीय तह निर्वाचन, कतै स्थगित कतै पुनः मतगणना
मधेस प्रदेशका जिल्लाको स्थानीय तहको मत परिणाम आउने क्रम जारी छ । यहाँका स्थानीय तहमा केही स्थानमा मतगणना सम्पन्न भएको छ, केहीमा मतगणना स्थगित भएको छ भने मतगणना स्थगित भएका केही स्थानमा त्रुटि सच्याएर पुनः मतगणना सुरु भएको छ । यहाँका अधिकांश स्थानीय तहमा मतगणना जारी छ ।
मतगणना स्थलमा विवाद भएपछि प्रहरीद्वारा हवाई फायर
लक्ष्मी चौधरीजनकपुरधाम, जेठ २ गते । धनुषाको धनौजी गाउँपालिकामा मतगणना क्रममा विवाद उत्पन्न भएपछि प्रहरीले हवाई फायर गरेको छ । धनौजी वडा १ को लखौरी गाउँको मतगणनाका क्रममा मतपत्र बढी देखिएपछि विवाद उत्पन्न भएको स्थानीयले बताएका छन् । विवादले उग्ररुप लिएपछि स्थिति नियन्त्रणमा लिन प्रहरीले एक दर्जन हवाई फायर गरेको थियो । यस्तै, गाउँपालिकाको ३, ४ र ५ को मतगणना सम्पन्न हुँदा तीनै वडामा काँग्रेसका उम्मेदवार निर्वाचित भएका छन् । वडा नं. १ को मतगणनामा समेत काँग्रेसकै अग्रता देखिएका कारण अन्य पार्टीका कार्यकर्ताले मतगणना स्थलमा विवाद उत्पन्न गरेपछि सो विवादलाई नियन्त्रणमा लिन प्रहरीले हवाई फायर गरेको निवर्तमान गाउँपालिका उपाध्यक्ष रामवती मण्डलले जानकारी दिनुभयो । मतगणना भइरहेको वडामा समेत काँग्रेसकै अग्रता देखिएको छ । गाउँपालिका अध्यक्षमा पनि काँग्रेसका उम्मेदवारले अग्रता लिएको मण्डलले बताउनुभयो । विवाद साम्य भएपछि सर्वदलीय बैठक बसिरहेको छ । दलहरुको निर्णयअनुसार मतगणना पुनः गरिने उहाँले जानकारी दिनुभयो । त्यहाँको अवस्था अहिले सामान्य रहेको छ ।उक्त गाउँपालिकामा वडा १ र २ मा मतगाणना हुन बाँकी छ । धनौजीमा जम्मा ५ वटा वडा छ । यसअघि पनि काँग्रेसकै अध्यक्ष एवम् उपाध्यक्ष निर्वाचित हुनुभएको थियो ।
जलेश्वर नगरपालिकामा जसपाले खाता खोल्यो
महेशकुमार दास जलेश्वर, जेठ २ गते । जलेश्वर नगरपालिकामा जनता समाजवादी पार्टी (जसपा) नेपालले खाता खोलेको छ । जारी मतगणना परिणामअनुसार जलेश्वर नगरपालिका १ को वडा अध्यक्षमा जसपाका अनिलकुमार झा विजयी हुनुभएको छ । झा ५४७ मत ल्याइ विजयी हुनुभएको जलेश्वर नगरपालिकाको निर्वाचन अधिकृत ठाकुरचन्द्र त्रितालले बताउनुभयो । उहाँको निकटतम प्रतिद्वन्द्वी लोकतान्त्रिक समाजवादी पार्टी (लोसपा) नेपालका राकेशकुमार साहले ४२७ मत ल्याउनु भएको निर्वाचन अधिकृत त्रितालले बताउनुभयो । जलेश्वर नगरपालिका १ मा निर्वाचित वडा अध्यक्ष झा यसअघि पनि सोही वडाको वडा अध्यक्षमा निर्वाचित भई ५ वर्षे कार्यकाल पूरा गरी वैशाख ३० गते सम्पन्न भएको चुनावमा मनोनयन दर्ता गर्नुपूर्व पदबाट राजिनामा गरी पुनः चुनावमा होमिनु भएको थियो । झा १२० मतको अन्तरले विजयी हुनुभएको छ । विजयी भएका वडा अध्यक्ष झाले जनताले अघिल्लो कार्यकालमा बाँकी रहेको अधुरो काम पूरा गर्ने जिम्मवारीकासाथ दोस्रो पटक जिताएको बताउनुभयो । ‘अधुरो काम पूरा गर्ने विश्वासका साथ चुनाव जिताउनु भएको छ, म जनताको विश्वासमा खडा उतार्ने प्रयास गर्नेछु’ उहाँले भन्नुभयो ।
सर्लाहीको धनकौल गाउँपालिका अध्यक्षमा कांग्रेसका रामआश्रय साह विजयी
जनार्जन खत्री सर्लाही, जेठ २ गते । सर्लाहीको धनकौल गाउँपालिकाको अध्यक्षमा नेपाली कांग्रेसका रामआश्रय साह विजयी हुनुभएको छ । निकटतम प्रतिद्वन्द्वी नेकपा माओवादी केन्द्रका फकिरा महतोलाई एक हजार ९९ मतले पछि पार्दै साह गाउँपालिकाको अध्यक्षमा निर्वाचित हुनुभएको धनकौलका निर्वाचन अधिकृत शिवदत्त बरालले गोरखापत्रलाई जानकारी दिनुभयो । साह गाउँपालिकाको निवर्तमान अध्यक्ष समेत हुनुहुन्छ । अध्यक्षमा विजयी साहले चार हजार ४७७ मत ल्याउँदा उहाँका प्रतिस्पर्धी माओवादी केन्द्रका महतोले तीन हजार ३७८ मत मात्रै प्राप्त गर्नुभएको छ । यस्तै, गाउँपालिकाको उपाध्यक्षमा कांग्रेसकै अकली सहनी चार हजार ५०४ मत ल्याएर विजयी हुनुभएको छ । सहनी पनि गाउँपालिकाको निवर्तमान उपाध्यक्ष हुनुहुन्छ । उहाँकी प्रतिस्पर्धी माओवादी केन्द्रकी निलमकुमारी देवी सहनीले तीन हजार २२५ मत मात्रै ल्याउनुभएको छ । सातवटा वडा रहेको धनकौलमा नेपाली कांग्रेस चार, नेकपा माओवादी केन्द्र दुई र नेकपा एमाले एउटा वडामा विजयी भएका छन् । कांग्रेसले वडा नं. १, २, ४ र ७, माओवादी केन्द्रले वडा नं. ५ र ६ तथा एमालेले वडा नं. ३ मा जित निकालेको छ । यस्तै, सर्लाहीका अन्य १८ वटा पालिकामा अहिले मतगणना जारी रहेको छ । तीमध्ये बलरा नगरपालिका, रामनगर गाउँपालिका, हरिपुर नगरपालिकालगायतका केही पालिकामा सोमबार बेलुकासम्म अन्तिम नतिजा आइसक्ने सम्वन्धित निर्वाचन अधिकृतको कार्यालयहरुले जनाएका छन् । जिल्लाको बरहथवा नगरपालिकामा भने मङ्गलबार वडा नंं. १७ मा पुनः मतदान भएपछि मतगणना सुरु गरिने निर्वाचन अधिकृत दशरथ पङ्गेनीले बताउनुभयो ।
धनुषाको सात वडामा कांग्रेस विजयी
धनुषाको बिभिन्न पालिकाका ११ वडाको अन्तिम मत परिणाम सार्वजनिक भएको छ । ती मध्ये नेपाली कांग्रेसले सात ,नेकपा (एकीकृत समाजवादी)ले दुई तथा नेकपा (माओवादी केन्द्र) र लोकतान्त्रिक समाजवादी पार्टीले एक/एक स्थानमा विजयी भएका छन् । कांग्रेसले जनकपुरधाम उपमहानगरपालिकाको वडा नम्बर १ र २ सहित मिथिला नगरपालिकाको वडा नम्बर १, धनुषाधाम नगरपालिका नम्बर १, मिथिला बिहारी नगरपालिकाको वडा नम्बर १, सबैला नगरपालिका वडा नम्बर १ र बटेश्वर गाउँपालिका–१ को वडाध्यक्षमा जित हासिल गरेको छ ।
धनुषाको १८ वटै पालिकामा मतगणना जारी
धर्बेन्द्र झा धनुषा, जेठ १ गते । धनुषाको १८ वटै पालिकामा मतगणना जारी रहेको छ । धनुषाको १० वटा पालिकामा नेपाली काँग्रेस, दुई वटामा नेकपा एमाले, दुईमा जसपा र लोसपा, एक वटामा माओवादी केन्द्र र एकमा स्वतन्त्र उम्मेदवारको अग्रता छ । जनकपुरधाम उपमहानगरपालिकाको मेयर पदमा नेपाली काँग्रेसबाट राजीनामा दिएर मेयर पदमा घन्टाघर चुनाव चिन्ह लिई स्वतन्त्र उम्मेदवारी दिनुभएका मनोजकुमार शाह अगाडि हुनुहुन्छ । शाहले १ हजार २ सय ६४ मतसहित अग्रता हासिल गर्नुभएको हो । उहाँलाई पछ्याउँदै नेकपा एमालेका उम्मेदवार शिवशङ्कर शाह हीराले ६ सय ३८ मत प्राप्त गर्नुभएको छ । त्यसैगरी, आँप चुनाव चिन्ह लिएका स्वतन्त्र उम्मेदवार बलराम महतोले ३ सय ८० मत प्राप्त गर्नुभएको छ । उपमेयर पदमा नेपाली काँग्रेसका उम्मेदवार किशोरी शाह १ हजार ३ सय ६२ मतसहित अग्र स्थानमा रहनुभएको छ भने उहाँलाई नेकपा एमालेका उम्मेदवार रुना झाले ६ सय ७५ मत ल्याई पछ्याउँदै हुनुहुन्छ । आँप चुनाव चिन्ह रहेका उपमेयर पदका स्वतन्त्र उम्मेदवार निर्मल चौधरीले ५ सय ५ मत प्राप्त गर्नुभएको छ । जनकपुरधाम उपमहानगरपालिकामा रहेको २५ वडामध्ये आईतबार चार बजेसम्ममा २ वटा वडाको मत परिणाम मात्र सार्वजनिक भएको छ । जनकपुरधाम उपमहानगरपालिका १ मा नेपाली काँग्रेसका दीपनारायण यादवले एक हजार १४३ मत प्राप्त गरी विजयी हुनुभएको छ । उहाँको निकटतम प्रतिद्वन्द्धी नेकपा एमालेका लभ अधिकारीले ५४१ मत प्राप्त गर्नुभएको हो । त्यसैगरी, वडा नम्बर २ मा नेपाली काँग्रेसका शिवकुमार शाहले ६६१ मत ल्याएर विजयी हुनुभएको छ । उहाँको निकटतम प्रतिद्वन्द्वी नेकपा एसका अशोक गुप्ताले २९५ मत ल्याउनुभएको हाे । वडा नं.३ मा तमलोपाका दीपेन्द्र शाह विजयी भए पनि औपचारिक घोषणा हुन बाँकी छ । जिल्लाभरिमा मतगणनाको क्रम निक्कै सुस्त भएकाले मत परिणाम आउनमा ढिलाइ भएको छ । प्रदेश निर्वाचन कार्यालयका प्रमुख श्रीधर पन्थीले दिनुभएको जानकारी अनुसार कमला नगरपालिका १ मा नेकपा माओवादी केन्द्रका सरददेव यादव, क्षिरेश्वरनाथ नगरपालिका १ मा नेपाली काँग्रेसका मुवारक कवाडी, नगराईन नगरपालिका १ मा नेपाली काँग्रेसबाट सीताराम महतो, बटेश्वर गाँउपालिका १ मा नेपाली काँग्रेसका अशोककुमार महतो, मिथिला नगरपालिका १ मा नेपाली काँग्रेसका जोगी महतो, लक्ष्मीनियाँ गाँउपालिका १ मा नेकपा एमालेका दिलिप यादव, २ मा नेकपा एमालेकै लालजी साह तेली, विदेह नगरपालिका १ मा नेकपा एमालेका सञ्जय पाण्डे, वडा नं.२ मा रामपुकार सहनी, शहीदनगर नगरपालिका १ मा नेपाली काँग्रेसका तेजीलाल यादव र हंसपुर नगरपालिका १ मा जसपाका रामदेव कापर विजयी हुनभएको छ ।
वीरगञ्ज महानगरपालिकामा गठबन्धनका सिंहको अग्रता
पर्साको वीरगञ्ज महानगरपालिकाको पछिल्लो मतगणनाअनुसार मेयर पदमा गठबन्धनका उम्मेदवार राजेशमान सिंहले एक हजार ३६३ मतसहित अग्रतालाई निरन्तरता दिनुभएको छ । उहाँका निकटतम प्रतिष्पर्धामा नेकपा (एमाले)का विजयकुमार सरावगीले ६५९ मत प्राप्त भएको छ । हाल वडा नं १, २, ३१ र ३२को मतगणना जारी छ । हालसम्म कूल तीन हजार ६७ मत मतगणना भएको छ । मतणना गर्न लामो समय लाग्ने भएका कारणले अन्तिम नतिजा आउन समय लाग्ने बताइएको छ ।
बरहथवा नगरपालिका-१७ मा पुनः मतदान हुने
सर्लाहीको बरहथवा नगरपालिका–१७ मा पुनः मतदान हुने भएको छ । निर्वाचन आयोगले उक्त वडामा पुनः मतदान गर्ने निर्णय गरेको जिल्ला निर्वाचन कार्यालय सर्लाहीका निर्वाचन अधिकारी दिवाकर भूजेलले जानकारी दिनुभयो ।
महोत्तरीको बर्दिवास–८ मा माओवादी विजयी
महोत्तरीको वर्दिवास नगरपालिकामा नेकपा माओवादीले मात्र ९ मतको झिनो अन्तरले पहिलो खाता खोलेको छ ।
सर्लाहीको अठार पालिकामा मतगणना जारी, दुईवटामा अन्यौलता
देशभरमै सबैभन्दा बढी स्थानीय तह रहेको सर्लाहीमा २० स्थानीय तहमध्ये १८ वटामा मतगणना चलिरहेको छ । शनिबार अपरान्हसम्म बरहथवा नगरपालिका र कौडेना गाउँपालिकामा भने मतगणना सुरु हुन सकेको छैन् ।
मलङ्गवा नगरपालिका १ को वडाध्यक्षमा काँग्रेसका यादव ११ मतले विजयी
जनार्जन खत्रीसर्लाही, वैशाख ३१ गते । सर्लाही सदरमुकाम मलङ्गवा नगरपालिका वडा नं. १ को वडाध्यक्षमा नेपाली काँग्रेसका नवलकिशोर यादव विजयी हुनुभएको छ । जनता समाजवादी पार्टी (जसपा) का उम्मेदवार राजकिशोर राय यादवलाई ११ मतको झिनो अन्तरले पराजित गर्दै यादव वडाध्यक्षमा निर्वाचित हुनुभएको हो । सो वडामा नेपाली काँग्रेसको प्यानल नै बिजयी भएको छ । वडाध्यक्षमा निर्वाचित हुनुभएका नवलकिशोरले ४२३ मत ल्याउँदा उहाँका निकटतम प्रतिद्वन्द्वी राजकिशोरले ४१२ मत ल्याउनुभएको छ । वडा नं. १ को मतगणना सकिँदा नगरप्रमुखमा पनि काँग्रेसले नै अग्रता लिएको छ । काँग्रेसका नागेन्द्र रायले ४५५ मत ल्याउँदा उहाँका प्रतिस्पर्धी जसपाका निरसल साहले ३६६ मत ल्याउनुभएको छ । उपप्रमुखमा काँग्रेसकै सकुन्तलादेवीले ४१८ मत ल्याउँदा जसपाकी पानोदेवीले ३७३ मत ल्याउनुभएको छ । मलङ्गवामा काँग्रेसले वडाध्यक्षमा चुनाव जित्दै खाता खोलेको हो । जिल्ला समन्वय समिति मलङ्गवाको सभा हलमा मतगणना जारी रहेको छ ।
वीरगञ्ज महानगरपालिकाको मतगणना सुरु
पर्सामा मधेस प्रदेशको एकमात्र महानगरपालिका, वीरगञ्ज महानगरपालिकासहित अन्य तीन वटा नगरपालिका र १० वटा गाउँपालिका रहेका छन् । १४ वटा पालिकामध्ये हालसम्म सात वटा पालिकामा मात्र मतगणना सुरु भएको हो ।
जनकपुरधाम महानगरमा मतगणना सुरु
धनुषास्थित जनकपुरधाम उपमहानरपालिकामा मतगणना सुरु भएको छ । जनकपुरधास्थित निधि भवनमा शनिबार बिहानदेखि मतगणना सुरु भएको हो ।
वीरगञ्ज महानगरपालिकाको मतगणना सुरु हुँदै
स्थानीय तहको निर्वाचनअन्तर्गत मधेस प्रदेशको एकमात्र महानगरपालिकाका वीरगञ्ज महानगरपालिकाको मतगणना आज बिहान १० बजेदेखि सुरु गरिने भएको छ । वीरगञ्ज महानगरपालिका–१४ पिपरास्थित नृसिंह माध्यमिक विद्यालय हुने मतगणनाको कार्यका लागि अहिले सर्वपक्षीय तथा सर्वदलीय छलफल जारी छ । छलफलपश्चात् मतगणनाको अघि बढाइने तयारी गरिएको मुख्य निर्वाचन अधिकृत धर्मराज पौडेलले जानकारी दिनुभयो । मतगणनाको तयारीका लागि उक्त विद्यालयको ‘सी’ ब्लकमा मतगणना कक्षमा आवश्यक फलामे तारजालीसहित सिसिटिभी जडान गरिएको हो ।
बारामा ५५ प्रतिशत मतदान
बारागढी सिम्रौनगढ प्रचरौटा मतदान केन्द्रमा मतदान सुरु हुन लाग्दा दुवै पक्षबीच झडप भएकामा अनुगमन टोलीले दुवै पक्षलाई सम्झाइ मतदान सुरु गराएको मुख्य निर्वाचन अधिकृत रेग्मीले बताउनुभयो ।
हावाहुरीले मतदान स्थलको टेन्ट भत्कायो
हावाहुरीले सिरहाको विभिन्न मतदनस्थलमा लागेको टेन्ट भत्काएको छ।