घिमिरेविरुद्ध उजुरी परेनन्


गोरखापत्र समाचारदाता

काठमाडौँ, असोज २ गते । अख्तियार दुरुपयोग अनुसन्धान आयोगको प्रमुख आयुक्तमा प्रस्तावित नवीनकुमार घिमिरेविरुद्ध संसदीय सुनुवाइ समितिमा कुनै पनि उजुरी परेन । संवैधानिक परिषद्को सिफारिस अनुसार नियुक्तिपूर्व हुने संसदीय सुनुवाइको प्रक्रियाका क्रममा समितिले घिमिरेविरुद्ध उजुरी आह्वान गरेको थियो ।
दश दिनको समयसीमा दिएर यही भदौ २३ गतेदेखि उजुरी आह्वान भएको थियो । सोमबारसम्मको समयसीमामा घिमिरेविरुद्ध कुनै उजुरी नपरेको हो । सङ्घीय संसद् सचिवालयका सहसचिव ध्रुवप्रसाद घिमिरेले प्रस्तावित प्रमुख आयुक्त घिमिरेविरुद्ध कुनै पनि उजुरी नपरेको बताउनुभयो । उहाँले भन्नुभयो, ‘हामीले १० दिनको समय दिएर उजुरी आह्वान गरेका थियौँ । सोमबार कार्यालय समयसम्म उजुरीको समय थियो । तोकिएको समयसम्म कुनै पनि उजुरी परेको छैन । अब सुनुवाइ प्रक्रिया अगाडि बढ्छ ।’
समितिले सुनुवाइको प्रक्रिया प्रारम्भ गर्नका लागि मङ्गलबार बैठक बोलाएको छ । यही असोज ४ गते विहीबार प्रस्तावित प्रमुख आयुक्त घिमिरेको सुनुवाइ गर्ने तयारी समितिले गरेको छ । संवैधानिक परिषद्ले घिमिरेलाई भदौ २० गते प्रमुख आयुक्तमा सिफारिस गरेको थियो ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds