मधेश सुपर ओभरमा विजयी

काठमाडौँ, वैशाख १३ गते । मधेश प्रदेशले वीर गणेशमान सिंह टी–२० राष्ट्रिय क्रिकेट प्रतियोगितामा सुदूरपश्चिम प्रदेशलाई सुपर ओभरमा पराजित गरेको छ ।

मुलपानी मैदानमा बिहीबार भएको खेलमा जितका लागि एक सय २२ रनको लक्ष्य पछ्याएको सुदूरपश्चिमले २० ओभरमा आठ विकेटको क्षतिमा एक सय २१ रन बनाएपछि खेल सुपर ओभरमा पुगेर सकिएको थियो ।

सुपर ओभरमा सुदूरपश्चिमले दिएको आठ रनको लक्ष्य मधेशले एक बल बाँकी छँदा पूरा गरेको हो । यसअघि सुदूरपश्चिमका लागि बसन्त खत्रीले ३८, किरण ठगुन्नाले अविजित २३, अविशेक पालले २२ र बसन्त कार्कीले १५ रन बनाउनुभयो । बलिङमा मधेशका रञ्जित कुमारले तीन विकेट लिनुभयो । विशाल सुश्लिङले दुई तथा अविशेक तिवारीले एक एक विकेट झार्नुभयो । 

यसअघि टस हारेर पहिले ब्याटिङको निम्तो पाएको मधेशले निर्धारित २० ओभरमा सात विकेटको क्षतिमा  एक सय २१ रन बनाएको थियो । मधेशका लागि रोहन विकले सर्वाधिक ४६ रन नबाउनुभयो । कप्तान राहुल मण्डलले २३, अविशेक तिवारीले अविजित २१ र विशाल पटेलले १४ रन जोड्नुभयो । 

बलिङमा सुदूरपश्चिमका लागि कप्तान हेमन्त धामी, नरेन साउद र शेर मल्लले समान दुई दुई तथा नारायण जोशीले एक विकेट लिनुभयो । जितसँगै ६ खेलबाट आठ अङ्क बनाएको मधेश तेस्रो स्थानमा उक्लिएको छ । पराजित सुदूरपश्चिम पाँच खेलमा चार अङ्क जोड्दै पाँचौँ स्थानमा छ । 

अर्को खेलमा कर्णालीले कोशी प्रदेशलाई पाँच विकेटले हरायो । जितका लागि ९४ रनको लक्ष्य पछ्याएको कर्णालीले ६.३ ओभरमा पाँच विकेटको क्षतिमा ९७ रन बनाएको थियो । यसअघि पहिले ब्याटिङ गरेको कोशीले १९.३ ओभरमा सवै विकेटको क्षतिमा ९३ रन बनाएको थियो ।

जितसँगै कार्णालीले ६ खेलबाट आठ अङ्क बनाएको छ । पराजित कोशी समानखेलबाट अङ्कविहिन बन्दै अन्तिममा छ ।