भेरी नदीको खोंचमा बेवारिसे शव फेला

राजु लामिछाने
रुकुमपश्चिम, माघ १८ गते । रुकुमपश्चिमको चौरजहारीमा एक पुरुषको शव फेला परेको छ । चौरजहारी नगरपालिका –३ को कुरलस्थित भेरी नदीको खोंचमा बेवारिसे अवस्थामा शव फेला परेको प्रहरीले जनाएको छ ।

जिल्ला प्रहरी कार्यालयका प्रहरी नायब उपरीक्षक (डिएसपी) नमराज भट्टराइका अनुसार नदिको खोंचमा अड्किएको अवस्थामा शव फेला परेको हो । उहाँका अनुसार अन्दाजी वर्ष ४० को देखिने, उचाइ ५ फिट ६ इन्च भएको, मोटो शरीर भएको व्यक्तिको शव फेला परेको हो ।

उक्त शवको औंलामा किरा परेर दुर्गन्धित भएको बताइएको छ । शवको माथिल्लो शरीरको भागमा आर्मी कलरको टिसर्ट र तल्लो शरीरको भागमा नीलो रङकाे फुल ट्रयाक रहेको डिएसपी भट्टराईले जानकारी दिनुभयो ।

उक्त शवको पहिचान हुन सकेको छैन । उक्त शवको घटनास्थल लाश जाँच प्रकृति मुचुल्का कार्य पूरा गरी पोष्टमार्टमका लागि जिल्ला अस्पताल सल्लेको शवगृहमा राखिएको छ ।