बाढीपीडितलाई होटल एशोसियसनको सहयोग

कबिराज घिमिरे 

हिले, असोज २८ गते । होटल एशोसियसन धनकुटाले भारतको सिक्किमका बाढीपीडित परिवारलाई आर्थिक सहयोग गर्ने उद्देश्यले रकम संकलन गरेको छ । एशोसियसनले सिक्किमका बाढीपीडितका लागि २ लाख २३ हजार ४ सय २५ रुपियाँ संकलन भएको पत्रकार सम्मेलनमार्फत जानकारी गराएको हो । 

संकलित रकम हिलेबाट ७६ हजार २ सय ५, पाख्रिबासबाट ६ हजार ५ सय १०, सिधुवा बजारबाट २३ हजार ५ सय ७५, मुलघाट र नमस्ते झरनाबाट १७ हजार ८६, धनकुटा बजारबाट ६९ हजार ५३ र भेडेटारबाट ३१ हजार रहेको होटल एशोसियसन धनकुटाको अध्यक्ष खगेन्द्र विष्टले जानकारी दिनुभयो ।

सिक्किममा गत असोज १६ गते आएको बाढीमा परी भएको जनधनको क्षतिलाई मध्यनजर गर्दै होटल व्यवसायी बढी प्रभावित भएकाले रकम संकलित गरिएको जनाएको छ । सो रकम भोलि र पर्सि सिक्किम पुगेर हस्तान्तरण गर्ने तयारी रहेको आयोजकले जनाएको छ ।