सिराज खान
नेपालगन्ज, असोज २८ गते । लायन्स क्लब इन्टरनेशनल डिष्ट्रिक्ट ३२५ एनले बझाङमा गएको भूकम्पपीडित भएका ३१० परिवारलाई विभिन्न राहत सामग्री वितरण गरेको छ ।
बझाङको दुर्गाथली गाउँपालिकाको समन्वयमा सो राहत सामग्री लिएर नेपालगन्जबाट बझाङमै पुगेर वितरण गरिएको लायन कृष्णप्रसाद श्रेष्ठले बताउनुभयो ।
उहाँले बझाङको दुर्गाथली गाउँपालिकाको समन्वय र एलसिआइएफ इमरजेन्सी ग्रान्टअन्तर्गत गाउँपालिकाका ३१० घर परिवारलाई चामल, दाल, तेल, नुन, झुल, तन्ना र पिफोम वितरण गरिएको बताउनुभयो ।
लायन्स क्लब इन्टरनेशनल डिष्ट्रिक्ट ३२५ एनका डिष्ट्रिक्ट गभर्नर लायन मुकुट ढकालको नेतृत्वमा नेपालगन्जबाट त्यहाँ पुगेको टोलीले दुर्गाथली गाउँपालिकाका उपाध्यक्ष जनकबहादुर दौल्यालको प्रमुख आतिथ्यमा आयोजना गरिएको कार्यक्रममा पालिकाका ७ वटै वडाका भूकम्पपीडितलाई राहत वितरण गरेको थियो ।
राहत वितरण कार्यक्रममा डिष्ट्रिक्ट ट्रेजरर लायन तेजप्रसाद अधिकारी, एओजी लायन कृष्णप्रसाद श्रेष्ठ, कमल चौधरी, वडा अध्यक्षहरू, स्थानीय राजनीतिक दल र स्थानीय प्रहरीका प्रतिनिधिको सहभागिता रहेको थियो ।
गत भदौ १६ गते बझाङमा गएको भूकम्पबाट ठुलो सङ्ख्यामा सर्वसाधारण पीडित भएका थिए । त्यहाँ सोही दिन २ पटक गएको भूकम्पले घरहरू भत्किदा ठुलो मात्रामा क्षति भएको थियो ।
