प्रतिनिधि सभाको उपभोक्ता हित समितिद्वारा सरोकारवालासँग छलफल

अविनाश चौधरी
धनगढी, असोज २५ गते । प्रतिनिधि सभाको उद्योग तथा वाणिज्य र श्रम तथा उपभोक्ता हित समितिले उपभोक्ता अधिकारको बारेमा सरोकारवालासँग छलफल गरेको छ ।

समितिले धनगढीमा दैनिक उपभोग्य वस्तु लगायत आपूर्ति व्यवस्थापनबारे सरोकारवालासँग छलफल गरेको हो । समितिका सभापति एवम् प्रतिनिधि सभा सदस्य अब्दुल खानले जुनसुकै तह र तप्कामा रहेको व्यक्ति उपभोक्ता रहेको उल्लेख गर्नुहुँदै नेपालीहरूको किनमेलको गन्तव्य भारत बनेकोमा चिन्ता व्यक्त गर्नुभयो ।

उहाँले वस्तु भारतमा किनेर नेपालमा गुणस्तर खोज्ने परिपाटी रहेको टिप्पणी गर्नुभयो । वस्तुको गुणस्तरका लागि आफै उत्पादन गर्न आवश्यक रहेको सभापति खानको जोड थियो । सानोभन्दा सानो वस्तु भारतमा किन्ने परिपाटी विकासको बाधक रहेको उहाँले स्पष्ट पार्नुभयो ।

उपभोग्य वस्तु र सेवा गम्भीर मानव अधिकारसँग जोडिएको विषय रहेकाले यसमा कुनै पनि सम्झौता हुन नसक्ने खानको भनाइ थियो ।

“यदि, मुलुकलाई समृद्ध बनाउनु छ भने स्वस्थ देश हुन आवश्यक छ”, उहाँले अगाडि थप्नुभयो, “स्वस्थ देश बनाउन स्वस्थ उपभोग्य वस्तु हुनु पर्दछ ।”

यस्तै, समितिका सदस्य हेमराज राईले बजारमा रसायनयुक्त खाद्य सामग्रीको बिक्री वितरण भइरहेकाले त्यसलाई नियन्त्रणका लागि सबै गम्भीर रूपमा लाग्नु पर्ने औँल्याउनुभयो । उहाँले बजार अनुगमन गर्ने सरोकारवाला निकायलाई राम्ररी योजना बनाएर वर्षभरि नै अनुगमनमा सक्रिय हुन आग्रह गर्नुभयो ।

समितिका अर्का सदस्य रेखा यादवले व्यापार व्यवसायमा खुलेयाम भ्रष्टाचार भइरहेको जिकिर गर्नुहुँदै त्यसलाई नियन्त्रण गर्नु पर्नेमा जोड दिनुभयो । अनुगमनमा जानेहरूले इमानदारिता देखाउनु पर्ने उहाँको भनाइ थियो ।

यसैगरी, समितिका सदस्य कान्तिका सेजुवालले कर्मचारीतन्त्र स्थायी सरकार रहेका कारणले नागरिकको खाद्य अधिकारको रक्षाका लागि गम्भीरतापूर्वक लाग्न आग्रह गर्नुभयो । महँगी नियन्त्रण गर्ने र नागरिकलाई सहज ढङ्गले सेवा दिने सवाल महत्त्वपूर्ण रहेको उहाँको भनाइ थियो ।

छलफल कार्यक्रममा सम्बन्धित विषयगत कार्यालयहरूले उपभोक्ता अधिकारको सवालमा आ–आफ्ना कार्यालयहरूले गर्दै आएको कामको बारेमा जानकारी गराएका थिए । कञ्चनपुरका प्रमुख जिल्ला अधिकारी गोपालकुमार अधिकारीले आफ्नो जिल्लामा पनि समय समयमा  बजार अनुगमन भइरहेको बताउनुभयो । उहाँले उपभोक्ता र व्यापारी दुवैमा सचेतनाको कमी रहेको औँल्याउँदै उनीहरूलाई सचेत बनाउनु पर्नेमा जोड दिनुभयो ।

यसैगरी, कैलालीका सहायक प्रमुख जिल्ला अधिकारी यज्ञराज जोशीले कैलालीमा आठ वटा सेक्टर बनाएर बजार अनुगमनको कार्य भइरहेको जानकारी दिनुभयो । प्रत्येक सेक्टरले आ–आफ्नो अनुकूल बजार अनुगमन गरी जिल्ला प्रशासन कार्यालयलाई प्रतिवेदन पठाउने गरेको उहाँले उल्लेख गर्नुभयो ।