बाजुरामा भूकम्पले केही घर भत्किए, सयौं चर्किए

शेरबहादुर सार्की
बाजुरा , असोज १७ गते । बाजुरामा पनि भूकम्पका कारण आंशिक क्षति भएको छ । बझाङको तल्कोटको आसपास केन्द्रबिन्द भएर मङ्गलबार गएको भूकम्पका कारण बाजुरामा एक दर्जन घर पूर्णरुपमा भत्किएका छन् भने सयौं घरचिराचिरा परेका छन् ।

मङ्गलबार दिउँसो २ः४० बजे बझाङको तल्कोट आसपास केन्द्रबिन्दु भएर ५.३ रेक्टरस्केल र त्यसपछि आधा घण्टाको फरकमा चैनपुर केन्द्रबिन्दु बनाएर ६.३ रेक्टर स्केलको भूकम्प गएको थियो ।

भूकम्पले खप्तड छेडेदह, बुढीन्दा, बडिमालिका, बूढीनन्दा र बुढीगङ्गा नगरपालिका लगायतका ठाउँमा क्षति गरेको जिल्ला प्रहरी कार्यालय बाजुराले जनाएको छ ।

खप्तड छेडेदह गाउँपालिका–५ मा ६, बूढीनन्दा नगरपालिका–७ र ९ मा तीन, बूढीगङ्गा–१ मा तीन घरमा क्षति भएको जिल्ला प्रहरी कार्यालय बाजुराका सूचना अधिकारी किशाेरसिंह ऐरीले बताउनुभयो ।

उहाँले भन्नुभयो, “बझाङमा केन्द्रबिन्दु भएर गएको भूकम्पले बाजुराका दर्जनौँ घर पूर्ण भत्किएको र सयौँभन्दा बढी घर चिराचिरा परेका छन् ।’’

भूकम्पका कारण बडिमालिका नगरपालिका–९ का ८ वर्षीय प्रलोप डिजी र सोही वडाका १३ वर्षीय सुन्दर सार्की सामान्य घाइते भए पनि अन्य मानवीय क्षति भने भएको छैन ।

बाजुराका अधिकांश घर छाना माटो र ढुङ्गाले बनेकोले सबै भन्दाबढी ती घर छानामा क्षति भएको छ । अहिले ठाउँ ठाउँमा प्रहरीले रिपोर्ट लिने काम गरिरहेकोले यकिन रिपोर्ट भने आइपुगेको छैन ।

बुढीनन्दा बडिमालिका,खप्तड छेडेदह, बडिमालिका र बुढीगङ्गा लगायतका स्थानीय तहमा भूकम्पले क्षति गरेको भन्ने कुरा जानकारी आएपछि आज बिहान प्रमुख जिल्ला अधिकारी भीमकान्त पौडेलसहितको टोली समेत अनुगमनका लागि त्यस फर्त गएको जिल्ला प्रहरी कार्यालय बाजुराका सूचना अधिकारी ऐरीले बताउनुभयो ।