सामुदायिक विद्यालयले दिवा खाजा पकाएरै खुवाउनुपर्ने

बाबुराम कार्की
वराहक्षेत्र (सुनसरी), भदौ २७ गते । इटहरी उपमहानगरपालिका क्षेत्रका सामुदायिक विद्यालयहरूमा अध्ययनरत विद्यार्थीहरूलाई दिवा खाजा विद्यालयमै पकाएर खुवाउनुपर्ने अनिवार्य नियम उपमहानगरले लगाएको छ ।

सामुदायिक विद्यालयहरूमा अध्ययनरत बालबालिकाहरूलाई विद्यालयमा टिकाउन र गुणस्तर वृद्धि गर्न सङ्घीय सरकारले बालदेखि पाँच कक्षासम्मका लागि दिवा खाजाको रकम १५ रुपियाँको दरले दिँदै आएको थियो । इटहरी उपमहानगरले बालदेखि ६ कक्षासम्मका लागि विद्यालयमै पौष्टिक दिवा खाजा खुवाउने व्यवस्था मिलाइएको छ ।

उपमहानगरले पहिलो पटक दिवा खाजाको टेण्डर जारी गरेर विद्यार्थीहरूलाई पौष्टिक खाजा खुवाउन लागेको हो । जङ्क फुड नखुवाउन उपमहानगरले पहिलो पटक दिवा खाजा पकाएरै खुवाउन टेण्डर लगाएको उपमहानगरले जनाएको छ ।

उपमहानगर प्रमुख हेमकर्ण पौडेलले सङ्घीय सरकारबाट प्राप्त एक करोड ९८ लाख ८४ हजार रुपियाँ सङ्घीय सरकारबाट प्राप्त अनुदान र बाँकी उपमहानगरपालिकाले दिवा खाजामा लगानी गर्ने बताउनुभयो । उहाँले भन्नुभयो बालबालिकालाई पौष्टिक आहार खुवाउन नगर लागिपरेको छ । नागरिकले नगरले सामुदायिक विद्यालयको शिक्षाको विकास गर्न र बालबालिकाहरूको सर्वाङ्गीण विकास गर्न पौष्टिक खाजाले सहयोग पुग्ने छ ।”

इटहरी उपमहानगरपालिकाले दिवा खाजा कार्यक्रमका लागि चालु आर्थिक वर्षमा नौ करोड ३२ लाख छ हजार २० रुपियाँ ८८ पैसा खर्च हुने उपमहानगरपालिकाले जनाएको छ । 

नगरले ल्याएको दिवा खाजा कार्यक्रमबाट उपमहानगर क्षेत्रका सामुदायिक विद्यालयमा अध्ययनरत आठ हजार २८ जना लाभान्वित हुने इटहरी उपमहानगरपालिकाका शिक्षा अधिकृत सन्तोष कार्कीले बताउनुभयो । 

नगरप्रमुख पौडेलले भन्नुभयो, “सबै सामुदायिक विद्यालयहरूलाई पकाएरै खुवाउन अनिवार्य नियम लगाएका छौँ । दिवा खाजाका लागि उपमहानगरले मेन्युसहित बोलपत्र आह्वान गरिसेकेको छ । हरेक दिन फरक–फरक खाजा हुने गरी बोलपत्र आह्वान गरेको हो ।”

यस्तो छ पकाएरै खुवाउने खाजाको मेन्यु

इटहरी उपमहानगरले बारअनुसारको मेन्यु बनाएर उपमहानगर भित्रका सामुदायिक विद्यालयहरूले विद्यालयमै दिवा खाजा खुवाउनुपर्ने व्यवस्था गरेको छ । 

पालिकाद्वारा सार्वजनिक गरिएको सूचनामा आइतबार प्रति विद्यार्थी दुई सय १० ग्रामको तीन किसिमका फलफूल खुवाउनुपर्नेछ ।  सोमबार विद्यार्थीहरूलाई भुटेको अण्डा र चिउरा, मङ्गलबार मिक्स गेडागुडीसँगै चिउरा खुवाउनपर्नेछ  भने बुधबार चामलको खीर र तरकारी खुवाउनुपर्नेछ । त्यस्तै बिहीबार दही, चिउरा र तरकारी खुवाउनुपर्नेछ । शुक्रबार खसी वा कुखुराको मासु र चिउरा खुवाउनुपर्नेछ व्यवस्था रहेको छ । साहाकारीका लागि भने मटर–पनिर र चिउरा खुवाउनुपर्ने पालिकाद्वारा सार्वजनिक गरिएको सूचनामै उल्लेख गरिएको छ ।  

यसअघि सङ्घीय सरकारले स्थानीय तहमार्फत विद्यार्थीहरूको दिवा खाजा बापतको रकम विद्यालयलाई प्रदान गर्दै आएको थियो । विद्यालयमा रकम समयमै नआउँदा खाजा खुवाउन विद्यालय प्रशासन लाई समस्या हुने गरेको थियो ।

पौष्टिक खाजाको व्यवस्था भएसँगै सामुदायिक विद्यालयहरूमा विद्यार्थीको सङ्ख्या बढ्ने बताइएको छ । इटहरी उपमहानगर क्षेत्रमा बालविकास, धार्मिक सामुदायिक विद्यालय गरी ५० ओटा विद्यालय रहेका छन् ।