विद्यालय व्यवस्थापन समितिका अध्यक्ष भीरबाट चिप्लेर मृत्यु

राजन रावत

हुम्ला साउन ३१ गते । बनमा पशु चराउन जानुभएका विद्यालय व्यवस्थापन समितिका अध्यक्ष मानसिंह सार्की भीरमा चिप्लेर लड्दै लडेर मृत्यु हुनुभएको छ । पशु चराई रहेको बेला घरमा उज्यालो गर्नका लागि सल्लाको झरो चिरेर टिप्ने क्रममा लडेर उहाँको घटना स्थलमै मृत्यु भएको हो । 

सर्केगार्ड गाउँपालिका–५ को भुवा गाउँका ६२ वर्षका सार्कीको बनमा पशु चराउन गएको बेला दिउँसो १ बजेको समयमा झरो टिप्ने क्रममा सेलपंसा भीरमा चिप्ले खस्दा घटना स्थलमै मृत्यु भएको गोठी गाउँका सूर्यबहादुर शाहीले बताउनुभयो । 

उक्त गाउँमा उज्यालोको अन्य व्यवस्था नभएपछि सल्लो झरो निकालेर दियालो बालेर उज्यालो गरिन्छ । मृतक सार्की वडा नम्बर ५ कै धुमचुमी आधारभूत विद्यालयको व्यवस्थापन समितिको अध्यक्ष समेत हुनुहुन्थ्यो । उहाँ पोर्खी सहकारी संस्थाको शेयर सदस्य समेत हुनुहुन्थ्यो । मृतक सार्की मस्टो देवताको धामी समेत हुनुहुन्थ्यो । सार्कीको घटना स्थलमै मृत्यु भएको प्रहरीले जनाएको छ ।