काठमाडौं, असार २० गते । प्रधानमन्त्रीको अभिव्यक्तिका विषयमा आपत्ति जनाउँदै प्रमुख प्रतिपक्षी नेकपा (एमाले)ले सदन चल्न नदिने अडान राखेपछि प्रतिनिधि सभाको आजको दोस्रो बैठक सूचना टाँसेर स्थगित भएको छ ।
बुधबार दिउँसो ३ बजे निर्धारित बैठक एक घन्टा ढिलो गरी सुरु भएको थियो । बैठकमा प्रधानमन्त्री पुष्पकमल दाहाल ‘प्रचण्ड’ले हालै एक कार्यक्रममा उल्लेख गर्नुभएको विषयप्रति सदनमा विपक्षीले आपत्ति जनाएका हुन् ।
विपक्षीको अवरोधपछि आधा घन्टाका लागि स्थगित भएको बैठक बुधबार बस्न नसकेको हो । संघीय संसद सचिवालयले साँझ ७ बजे सूचना टाँसेर अर्को बैठक शुक्रबार दिउँसो ३ बजे बस्ने जानकारी गराएको हो ।
